PVL khelh hun tur a chiang
Pro Volleyball League khelh hun tur tih chian a ni ta, tualchhung volleyball inelna sang leh lian ber hi April 23 aṭanga khelh ṭan tur niin May 31-ah a hmawr bawk a ni dawn, inelna hi LPS Arena, Falkland Vengah khelh tur a ni ang.
Inrinni khan LPS Vision director Lalsawmliana Pachuau office, Zarkawtah LPS aiawh leh Mizoram Volleyball Association hruaituten inremna siam felin, a hma aia changtlung leh hmasawn zawka kalpui tumin ruahmanna an siam a ni.
Mizoram Volleyball hruaitute chuan LPS nen thawk duna Pro Volleyball vawi ruk an buatsaih tawhah Mizo player-ten hma an sawn phah hle tih an sawi a. Tun hnai maia neih zawk tak North East Olympic Games volleyball-ah chiang takin Mizoram mipa team an champion a, Pro Volleyball rahchhuah hlawhtlinna a ni, an ti.
April 23, Thawhlehni zanah khel ṭanin vawi khat ṭheuh mipa team ruk leh hmeichhe team nga an inkhelh kual hnua a sang paliin semifinal an lut ang. May 30, Ningani zanah hmeichhe final a ni ang a, May 31, Zirtawpni zanah mipa final hmangin championship hmawrbawk a ni ang.
Mipa lamah champion lai Thutak Nunpuitu Team, vawi hnih champion tawh Hunthar, 2022 champion Durtlang North, 2019 champion Chhinga Veng Spikers, Tuichangral leh kai thar Hlimen an inel dawn a; hmeichhe lamah champion lai Luangmual, 2019 champion Durtlang, Bungkawn, kai thar pahnih Serkawn Lunglei leh Diakkawn Kolasib an inel ve thung ang.
Mizoram volleyball inelna sang ber hi a vawi khat nan LPS Arena-ah khelh a ni dawn a, ni 39 chhung awhin mipa inkhel 18 leh hmeichhia 13, a vaiin inkhel ṭum 31 a awm dawn a ni.
Hlawhtling takin championship hnuhnung ber khar a ni a, nikum June 30 khan final-ah TNT-in Hunthar 3-2-in an hneh. A vawi khat nan Pro Volleyball champion an nih rualin Mizo hlanga mipa champion ni thei hmasa ber an ni a, Vanlalṭanchhana'n player ṭha ber leh spiker ṭha ber chawimawina a dawng a ni.
Nikum June 29-ah hmeichhe final a ni ve thung a, Luangmualin Kanan 3-0 in an hneh. Pro Volleyball-a an tel hmasak berah Luangmual champion nghalin Gujarat aṭanga an lak luh Nipa Barad chuan a thawh hlawk hle.