Harry Kane tan nomawi duan a ni lo?

Bundesliga-ah match sarih chauh khelh tur a awm tawh a, Bayern Munich-in Bayer Leverkusen point 13 ngawtin an pha lo. Bavarians-in an elpui Borussia Dortmund 3-0 an hneh loh zawhah manager Thomas Tuchel-a'n Leverkusen a lawmpui der tawh! Harry Kane tan tun season-a Bundesliga champion beiseina a tawp a, Tottenham Hotspur aṭanga Munich pantu hian tun season-ah nomawi a chawi dawn a nih chuan Champions League-a champion a ṭul ang.

Inrinni zan Der Klassiker-a Bayern an chak loh hmain Bayer Leverkusen-in Hoffenheim an mikhual a, Xabi Alonso hoten champion zia an chhuah. Hoffeinheim-in Maximilian Beier goal hmangin hun rei zawk hma hruai mah se Leverkusen-in hun tawp hma hretin Robert Andrich leh Patrik Schick te hmangin an lethal.

Champion zia chu

BayArena-ah Bayer Leverkusen-in bul ṭan chhe lo mah se Hoffenheim-in goal an khung hmasa zawk. Minute 33-naah Wout Weghorst pass chu Maximilian Beier-a'n goal-ah a chantir a, stadium-a mipui tam zawk an ngawi.

Goal luh hnuah Leverkusen-in na zawkin goal an nawr a, Granit Xhaka leh Florian Wirtz ten box pawn aṭangin goal khung tum mah se an vannei bik lo. Hoffenheim-in goal venhim an tum miau avangin Leverkusen-in goal khung an harsat.

Chutihrualin Wirt-a theihna sang tak chu Hoffenheim tan dan a harsa a, German midfielder hian hmun harsa aṭangin goal chance a siam leh mai ṭhin. Hoffenheim keeper Oliver Baumann-a'n Patrik Schick leh substitute Amine Adli te goal khung tur a dan chu pui tak a ni a, Leverkusen tan beidawnna tham a tling.

Mahse, Alonso hote an tlawm duh lo. Minute 88-naah Wirtz-a ball vawrhluh chu Jonathan Tah-a'n tauh letin Germany international Robert Andrich-a'n goal-ah a chantir a, Leverkusen-in an la duh tawk lo. Injury time-ah Nathan Tella cross chu Patrik Schick-a'n goal-ah a chantir a, Leverkusen 2-1 in an chak.

Leverkusen an vannei a, chutihrualin goal khung tum hian shot vawi 36 zet an nei - chak an tum ve bawk a ni. Alonso hote hian match 39 chhung hneh loh an tawng tawh lo a, German record an siam chhunzawm zel. Hei chauh hi a ni lo, Alonso hote hi Bundesliga bakah DFB Pokal leh Europa League-ah a champion thei dinhmunah an ding. Spanish manager-in a chhuah loh tur thu a tichiang a, team boruak a ṭha hle.

Bayern an tlawm

Chak mamawh Bayern Munich-in an hmelma Borussia Dortmund chu Allianz Arena-ah 2-0 in an hneh lo a, Thomas Tuchel hoten beisei an pha lo chhunzawm zel. Dortmund hian minute 10-na lekah Karim Adeyemi hmangin an khung a, Julian Brandt ball pek a ṭha a, chutihrualin Manuel Neuer inhliam vanga lut Sven Ulreich-a'n a hna a thawk tawk lo.

Bayern-in siphurh sutna remchang an nei a, mamawh hunah Kane-a zuzi. England captain hian hnai tak aṭangin a tauh goal lo. Tottenham aṭanga Bayern zawmtu Eric Dier pawhin hnai tak aṭangin a tauh goal bik lo a, pressure sang an zo loah a ngaih theih hial.

Dortmund erawhin chak tumin theihtawp an chhuah a, Mats Hummels-a'n Kingsley Coman-a cross a pet chhuah hmante chu a ṭha thlawt. Goal hmaah Dortmund an hriam zawk a, minute 83-naah Julian Ryerson-a'n chak nemnghehna goal a khung.

Season tawp ruala chhuak tur Bayern manager Thomas Tuchel chuan, "Vawiin inkhel zawhah chuan point-in awmzia a nei tawh lo. Tunah engzat nge kan inthlauhna? Leverkusen ka lawmpui e," tiin an elpui Bayer Leverkusen chu an champion chiang tawha a ngaih thu a sawi.