Leverkusen-ah Alonso a nghet; Liverpool a pan dawn lo!

Liverpool fan-te beiseina leh mang ram zawng zawng chu thawklehkhatah tihboin a awm a, romei ang maiin a thamral ta - an club player hlui, Bayer Leverkusen boss Xabi Alonso chuan German club a chhuahsan loh tur thu a puang.

Liverpool manager Jurgen Klopp-a'n season tawpah a chhuah tur thu a sawi rual khan, Liverpool hi Alonso nen sawizawm nghal an ni a, a club hlui, a la ngaihhlut ve reng a nih avangin Spanish coach hian a zawm mai ringtu an tam hle.

Mahse, Bayern Munich pawhin Thomas Tuchel thlaktu tura an hel coach hi club lian enkawl turin a hmanhmawh lo a, Leverkusen-a cham turin thutlukna a siam. Alonso chuan, "He hmunah hian ka hlim a, thutlukna dik a niah ka ngai thlap a ni," a ti.

Alonso hian tun season-ah Bayer Leverkusen chu awihawm lo khawpa ṭhain a kaihruai a, Bundesliga nomawi chawi thei dinhmunah an ding mek - Inrinni zan khan league match-ah Hoffenheim chu 2-1 in an hneh a, Hoffenheim tan Maximilian Beier chuan goal hmahruai khung mah se, Robert Andrich leh Patrick Schick hmanga chhangletin, Bundesliga-ah hma an hruai fal zel.

A chiang ta

Kum 42 mi Alonso chuan, "Ka hma hun chungchangah thil sawi tam tak a awm tih ka hria. Mahse, match khelh tur a tam avangin kan buai a, game-ah bak rilru ka pe hman lo. Thutlukna siam turin international break neih hun ka nghak a ni," a ti.

Alonso chuan German club-a cham a tum chhan sawiin, "Ka player-te inpekna, duhna leh season duhawm tak hman châka tuihalnate hian he team ringtawk zel tur hian min fuih phur a, he hmunah hian ka hna ka la zo lo," tiin a sawi.

Alonso hian player a nih laiin Real Sociedad aṭangin a zinkawng a zawh ṭan a, Eibar-ah loan-in a khel tawh a, hemi hnuah hian Liverpool, Real Madrid leh Bayern Munich tan a khel zui.

Spanish coach chuan amah duhtu a club hluite chungchang sawiin, "Tun ang dinhmun an din laia club dang chungchang ka lo sawi hi a fuh lo mai thei. Ka lo khelh tawhna club-te nen sawizawm ka ni ngei a, ka zah em em vek a ni," a ti.

Alonso a hlim

Player a nih laia Spain tana World Cup nomawi pakhat leh European Championship nomawi pahnih chawitu Alonso chuan, "Bayer Leverkusen-a ka awm hian, ka awmna tur dik taka awma inngaihna ka nei a, he club leh player te nen hian hma lam panin, ke pen ho zel ila ka duh a ni.

"Rin thu mai mai kan sawi hnem tawk ta. Ka awmna apiangah nuam ti taka awm hi ka duh a, Leverkusen hi nuam ka ti hle a ni," a ti - Bayern Munich honorary president Uli Hoeness chuan Alonso hi anmahni bakah Liverpool leh Real Madrid-in an dawr thu a lo sawi tawh.

Liverpool leh Bayern hian season tawp rualin coach an nei tawh dawn lo a, Real erawh an coach ni lai Carlo Ancelotti chuan June 2026 thleng Real-ah hian contract a la nei.

Alonso hian Ancelotti chhuah hun nghak a, hetih chhunga Leverkusen-a inchher hriam hi a duh a ni lo maw? tia zawhna pawh media tam takah hmuh tur a awm a, Alonso-a'n a chhuah loh chhan a sawi erawh, a hlim vang a ni.

Hrethiamtu Klopp

Alonso-a'n Liverpool-ah season nga a khelh chhungin league nomawi chawi lo mah se FA Cup, FA Community Shield, Champions League leh UEFA Super Cup-ah te champion nomawi a chawi a, Liverpool tana Premier League nomawi a chawi lo chu a career-a pawi a tih ber a nih thu a sawi ṭhin.

Reds ṭantuten hei vang hian Alonso hi an hnena coach anga kir turin an beisei a, film ziaktuin ngaihnawm taka a tawpa a changtupa a hlawhtlintir ang maia a hoa league nomawi chawi an châk - tun atan erawh beisei bo mai a ni ta.

Klopp chuan, "Leverkusen-ah hna ṭha tak a thawk a, team ṭha tak an nei a, he team hi an la remkhawm zel ka ring bawk. Hetiang ang taka team khairual ṭha enkawlna chance hi a tam lo a, chhunzawm a duh hi ka hrethiam em em a ni.

"Alonso-a dinhmun angah hian ka lo ding tawh a, amah ang thoin thutlukna ka siam a, ka inchhir lo," a ti. German coach hian Mainz aṭanga a coaching career ṭanin Borussia Dortmund-ah hming a chher a, Dortmund a awm lai hian club lian tam tak sawmna hnarin, German club hmuhnawm tak a din.

A zinkawng chu

Alonso hian player a nih laiin Anfield a chhuahsan hnuah Real Madrid a pan a, La Liga, Copa del Rey (2), Spanish Super Cup leh Champions League-ah te a champion. Spanish club-ah hian a coaching career ṭanin, kum 2018 khan Real Under-14 a enkawl.

A hnuah Real Sociedad B team enkawlin, October 2022 khan Leverkusen a zawm a, manager puitling hna hmasa ber petu club hi chhuahsan a duh rih lo. Liverpool hi pan ta se, Klopp a thlak dawn miau avangin 'pressure' a sang dawn a, a la inpeih rih lo niin a lang.

Player a nih laia Bundesliga (3), DFB-Pokal leh DFL Supercup nomawi a chawina Bayern-ah kal se, Tuchel hnuaia beisei phak lo an nih avangin pressure a sang lo hret mai thei. Mahse, Leverkusen chhuahsan a, Bayern zawm nghal chunga Leverkusen fan-te thinlung tihnat a duh lo niin an sawi.

Alonso hian Leverkusen hi league-ah hma a hruaipui a ni mai lo, Bayern Munich-in 2-0 a Borussia Dortmund an ngam loh avangin point 13 ngawtin hma an hruai fal tawh a, an kut lehlamin nomawi an khawih tawh - German Cup-ah semifinal lut tawhin, Europa League quarterfinal a hruai thleng bawk.