Yamaha MBA Inter Club Championship vawiinah neih ṭan a ni dawn

Yamaha MBA Inter Club Badminton Championship 2024 chu vawiinah khelh ṭan a ni dawn ta a, inelna hi Ramhlun Indoor Stadium leh Bawngkawn YMA Hall-ah te neih tur a ni ang.

Mizoram Badminton Association buatsaih MBA Inter Club Championship 2024 hi club hrang hrangte tana MBA-in team championship hmanga inelna a buatsaih hmasak ber a ni a, Yamaha, Thansanga & Sons-te sponsor niin, club hrang hrang 29 aṭangin team 88-in inelna an hmachhawn dawn a ni.

April 6, Inrinni thlenga neih tur inelnaah hian category pakuaah inelna neih tur niin, Under-15 Boy's & Girl's team, U19 Boy's & Girl's team, Men's team, Women's team, 35+ Men's team, 45+ Men's team leh 55+ Men's team-ah te inelna neih a ni dawn a, match hmasa lam hi YouTube/Lalnunsiama Hmar-ah live tur niin, quarterfinal aṭangin LPS leh Zonet-ah live-a pekchhuah a ni ang.

Junior category (U15 leh U19), Women's team leh Masters category (35+ leh a chunglam) ah te hian best of three hmanga inelna neih a ni ang a, Men's team te erawh chuan best of five an khel ang a, he category bikah hian team khatin singles vawi thum leh doubles vawi hnih an khel thei ang.

Yamaha MBA Inter Club Badminton Championship 2024-ah hian team 88 aṭangin players 300 chuangin an hming an pe lut a, an inhnehtawk dan azirin match 200 aṭanga 250 chuang en tur a awm dawn - MBA-in tournament a siam tawh zinga lian leh match tamna ber tur pawl a ni dawn tihna a ni.