Burnley kim lo leh Chelsea inhnehtawk

Chelsea tih hming hi a ropui ṭhin a, club lian tan pawh hmachhawn châkawm lo tak an ni ṭhin. Mahse, tunah erawh thawnthu a danglam ta, team tenau Burnley nen 2-2 in an inhnehtawk.

Mauricio Pochettino naute hian vawi hnih ngawt hma hruai hmasa mah se an hum thei lo, an hum theih lohna hi player kim loa khel Burnley an ni a, an coach Vincent Kompany hnawhchhuahsak niin, an inkhelhna hmun hi Stamford Bridge a la ni zui!

Inrinni zan Premier League inkhelah Burnley defender Lorenz Assignon chu minute 40-naah hnawhchhuah a ni a, penalty a la chawi zui. Penalty hi Cole Palmer chuan an goal hmahruai atan a khung.

Assignon-a hi Mykhailo Mudryk a tih tluk avanga hnawhchhuah a ni a, yellow card pahnihna a hmuh avangin Kompany a lungawi lo, a lungawi lohna nasa taka a lantir avangin hnawhchhuah a ni ve bawk.

Player pakhat leh coach kim lo an nih tak avangin Burnley dinhmun a chhia. Mahse, second half tirah Josh Cullen hmangin mawi zetin an sut a, Blues forward ṭha Palmer-a'n khung nawn leh mah se Dara O'Shea hmangin an sut leh a, point an insem.

EPL table-a 11-na Blues manager Mauricio Pochettino chuan, "A nihna tak sawi chuan goal khat a hmahruaitu zawk kan nih pawh hian kan hlauthawng tlat ṭhin. He kan harsatna hi sutkian a ngai a, kan zavaiin insiamṭhat kan ngai hle.

"Kan goal nawr a na tawk lo a, keimahni goal venghim turin kan bei na tawk lo bawk. Midangte elphak turin theihtawp kan chhuah a ngai," a ti. League match 28 aṭanga point 40 chauh an la hmuh avangin season tharah European football an khelh phak a rinawm tawh lo a ni.