Barcelona an chak hram

La Liga champion lai Barcelona chuan an nomawi kawl lai hloh mai an tum bik lo. Inrinni zan khan an mikhual Las Palmas chu 1-0 in an hneh a, hmahruaitu Real Madrid nena an inkar chu point ngaah an sawm zim.

Nou Camp-a inkhelah mikhual team goalkeeper Alvaro Valles chu minute 26-na lekah hnawhchhuah a ni a, coach Xavi leh a naute hi nuamsa taka chak tura ngaihna a lian hle, mahse rin lawk anga awlsam nghawt erawh a ni bik lo.

Goal kan hmu mai lo, bench aṭanga substitute Joao Felix-a luh hnuah inkhel a danglam hret. Portugal international forward Felix hian minute 59-naah Raphinha tan a siamsak a, goal dang lut zui loin point thum an hlawh chhuak.

Hun tawp dawn lamah Catalan an talbuai teuh hle, Las Palmas winger Alberto Moleiro chuan si phurh sut theihna remchang nei mah se goal ban hrulah a pet chhuak hlauh - Xavi leh a naute an him hram.

Barcelona manager Xavi chuan, "Season bul kan ṭan fuh tawk lo tih chu kan hre vek a, siamṭhat theih pawh a ni tawh lo. Mahse, tunah hian nomawi pahnih chawi theih kan la nei, chumi tih hlawhtlin tum chuan theihtawp kan chhuah zel ang," tiin a la beidawn loh thu a sawi.

Nizan khan Real Madrid an inlan a, an chak a nih chuan Barcelona nen an inthlauhna hi point riatah an ti fal leh thei dawn a ni - nizan bakah league match khelh hmabak dang pariat an la nei bawk.