United nena sawizawm Wolves boss-in a pha

Wolverhampton Wanderers boss Gary O'Neil-a'n Manchester United nena sawizawm an nihna chu a pha a, thuthang dik lo mai a nih thu a sawi.

O'Neil chuan,"Khawi aṭangin he thu hi a lo irh chhuah kei pawhin ka hre lo. Kan naupan têt aṭangin Liverpool leh Manchester United hi chu kan club ngaihsan em em kha a ni ṭhin a, thudik ni lo mah se, min sawizawm hrim hrim pawh hi ka lawm," a ti.

United-ah hian British sumdawng hausa tawntaw Sir Jim Ratcliffe chuan 27% stake a lei a, a company Ineos group chuan United-a football bik inrelbawlnaah thuneihna pumhlum an nei - tun hnaiah team din thar tumin hma an la mek nia sawi a ni.

Ineos director of sport Sir Dave Brailsford kaihhruaihna hnuaiah coaching team ṭha tak din an tum niin ESPN chuan a tarlang a, O'Neil hi coaching staff zinga tel turin an duh niin an sawi - head coach atan England manager Gareth Southgate, Brighton & Hove Albion boss Roberto De Zerbi leh Brentford coach Thomas Frank hming an sawi ri bawk.

O'Neil chuan, "Wolves hi nuam ka ti. Head coach ka ni a, head coach ka ni bawk ang. Press conference ka hmachhawn dawnin kan media team-in United nena sawizawm ka nih chungchang hi min hrilh a, ka hre ve chauh," a ti!

Kum 40 mi O'Neil hian season ṭan nan ni hnih chiah a awm tawh tihah, Wolves-in coach Julen Lopetegui an ban avangin Premier League club hi a enkawl ṭan a, sum hman tur a nei lo chungin Premier League top 10 lamah hun a hmanpui reng thei a ni.

O'Neil hian Wolves hmain Bournemouth chu club a lo enkawl tawh a ni a, season hmasa khan Premier League inhamtanpui mah se, Cherries hian an ban a, Wolves-ah a hming a chher zui.

Red Devils hian Southgate bakah a coaching staff-te zawng zawng chu lakluh an duh nia sawi a ni a, Erik ten Hag-a hma hun a chiang lo zel.