Premier League hnaihtu Ipswich Town

Championship lamah pawh season thara Premier League khelh tuma inum boruak a 'hot' chho zel - Ipswich Town chuan table chung ber luah turin Blackburn Rovers chu 1-0 in an hneh a, Conor Chaplin chuan inkhela goal awmchhun a khung.

Zirtawpni zana Ipswich Town an inlan hma hian, an elpui Leicester City chuan 1-0 in Bristol City an ngam lo a, mualneitu Bristol tan hian Anis Mehmeti chuan goal a khung - Ipswich chuan an chak chuan hmahruaitu Foxes an lehpel thei dawn tih an hria a, 1-0 in Blackburn an hneh a, table chung ber an luah.

Leicester leh Ipswich inlan hnuah Leeds United inlan ve lehin, chak chiah se, point khatin Ipswich an lehpel ang a, table chung ber an luah ang. Mahse, Ipswich vanneih a kaltluang, tiin a sawi theih a, Leeds hi an chak zo lo ve leh!

Leeds hian Watford chu khualmualah an lenchilh a, vawi hnih ngawt a hnufual zawkah an ṭang hial - Watford hian Bayo Youssouf leh Emmanuel Dennis-a goal hmangin, first half chhungin vawi hnih ngawt hma an hruai hman a, Leeds tan Crysencio Summerville chuan Watford goal khung karah goal khat a khung ve.

Mikhual Leeds hian rei tak goal an khung lo zui a, an tlawm mai dawn niin a lang hman. Mahse, Mateo Joseph chuan minute 85-naah khung ve lehin, si phurh a sut zo a, hun tawp thlenga goal dang lut loin, team pahnihin point an insem.

Championship table chung berah Ipswich an awm a, Leeds leh Leicester ten an dawt - team pathumin point khat ṭheuh bakin an inthlau lo a, season thara Premier League khelh phak tum inum boruak a ngaihnawm hle.

Premier League hnuai chiah Championship-a pahnihna chin hi season thara English top flight league khel turin an inpetkai ṭhin a, pathumna aṭanga paruknaten playoff hmangin hmun ruak pakhat an inchuh ve leh ṭhin a ni.