Milan chak laiin Juve chak lo

Serie A champion tur a chiang thawkhat tawh a, palina chin nih tuma inelna erawhin a vawr tawp a thleng mek thung. Inkhel pawimawhah AC Milan chuan Fiorentina 2-1 in an hneh; Juventus erawh Lazio khelmualah 1-0 in an tlawm thung.

Stefano Pioli naute hian Ruben Loftus-Cheek leh Rafael Leao te hmangin goal an khung a, mualneitu Fiorentina tan Alfred Duncan chuan Milan goal pahnih luh inkar lakah a lo khung ve bawk.

Milan hian pahnihnaah an dinhmun an sawhnghet, anmahni hnaih bertu Old Lady an chak loh bawk avangin an inthlauhna chu point ruk a ni. Hmahruaitu Inter Milan erawh match khata khel tlem chungin point 11 zetin an la fal tho a ni.

Milan tana goal khungtu Leao chuan, "Eng angin nge season bul kan ṭan tih ai chuan, eng angin nge a hmawr kan bawk tih hi a pawimawh zawk. Chuvangin kan hmabak zawng zawngah hian theihtawp kan chhuah zel tur a ni ang," a ti.