Inrinni zan ISL-ah chak awm lo

International break zawh hnuah Indian Super League pawh khelh ṭan a ni leh ta a, Inrinni zan khan match hnih awmin, chak result hmuh tur a awm lo - Jamshedpur FC leh Kerala Blasters chu 1-1 in an inhnehtawk a, Bengaluru leh Odisha te 0-0 in an inhnehtawk bawk.

Jamshedpur khelmualah Kerala Blasters-in Dimitrios Diamantakos hmangin goal hmahruai an khung a, mahse, Men of Steel hian Javi Siverio hmanga sut ve lehin, point an insem - Jamshedpur tan PC Laldinpuia chuan inkhel bul a ṭan.

Inrinni zan inkhel dangah Bengaluru leh Odisha ten goal khung an harsat ve ve a, point khatah lungawi an zir. Bangalore club tan rawlthar ṭhangduang Lalremtluanga Fanai chuan inkhel bul ṭanin, Odisha lamah Jerry Lalrinzuala, K. Lalṭhathanga (Puitea) leh Isak Vanlalruatfela ten inkhel bul an ṭan a, Jerry leh Isaka ten goal khungna chance nei mah se, an vanneih zan a ni lo.