Man City leh Arsenal inhnehtawk

Premier League champion lai Manchester City leh an nomawi kawl lai chuhpui mektu Arsenal te chu goal awm lo 0-0 in an inhnehtawk, team pahnih hian league match pakua ve ve khelh hmabak an la nei a ni.

Pathianni zan Man City leh Arsenal an inhnehtawk hma hian Liverpool an inlan a, goal an phurh hmasak hnuah Reds hi an tho chhuak - an elpui dangten point hnih an paih avangin Jurgen Klopp-a naute hian hma an hruai rih.

Player thlan

Premier League boruak san vanglai a ni bawk a, champion tum ve ve an nih avangin Manchester City leh Arsenal te hian an inkhel tur hi an ngaipawimawh hle, international break laia an chet duh danah pawh hei hi a lang.

Kevin de Bruyne chu Belgium squad aṭangin a in hnukdawk nghal a, hliam vang tih ni mah se club tana match pawimawh khelh hmabak a awm vang a nih a rinawm, a hunah tak inkhel bul ṭantu zingah a tel leh chat thei.

Defender ṭha Kyle Walker leh John Stones te erawh England tana an fehchhuahna lamah an inhliam. Walker hi squad-ah a hming a lang lo, defender pakhat zawk Stones pawh bench lamah dah a ngai.

Pep Guardiola-a'n centre back pali - Ruben Dias, Nathan Ake, Josko Gvardiol leh Manuel Akanji te bul a ṭantir vek a, an hmaah Rodri awmin, tlarhma laiah an chhuanvawr Erling Haaland a awm thung.

Arsenal lamin an thiampuipa Bukayo Saka chu hliam damkawr chungin an chhawr a, a laklawh laia thlak a ngai. Gabriel Martinelli leh Leandro Trossard te enkanin Gabriel Jesus chu bul ṭan tir a ni a, midang chu bul ṭan ṭhang vek an ni.

City dangchat

Pep Guardiola nauten an tih ṭhin dan pangngaiin ball an chang tam a, inkhel pawh an thunun viau. Etihad Stadium-ah hian a zawnin league match 47 chhung goal an khung thei, chuvangin khung leh mai tura ngaih pawh an ni.

Mahse, De Bruyne leh Bernardo Silva te che vel chu Declan Rice leh Jorginho ten an lo dangchat hmiah hmiah zel a, Citizens player ṭha pahnih te hian striker palian Haaland tan ball ṭha leh hlauhawm an siamsak thei lo.

Mahni inveng uluk tak chunga khel Arsenal tan Jesus chu hun ṭha neitu a ni. Amaherawhchu, Brazil international striker hian duhtui taka a shot chu goal ban hrulah a kal liam a, keeper Stefan Ortega tan hna a tling pha lo.

Mikel Arteta naute hi hlauthawng lo tawp an ni bik lo, defender Ake-a'n hnai tak aṭangin tauh ṭhelh mah se a dar a per thoin keeper David Raya hmazawnah chiah a kal, a sir hret ni se chu a hnaih em avangin a goal tho a rinawm.

Bench aṭanga Jack Grealish, Jeremy Doku leh Rico Lewis te luh hnuah Man City goal nawr phung a danglam hret a, a lai a phui hneh em avangin mual sir aṭanga ball lakluh an tum, mahse hei pawh hi Arsenal lamin an dangchat thei tho.

Arsenal hlawhtling

Etihad Stadium hi Arsenal tan hmun ralṭi a ni a, he hmuna an chak hnuhnung ber chu kum 2015 January thla daih tawh kha a ni. Tun hnai inelna hrang hranga an len luh hnuhnung pariatah phei chuan an tlawm fai vek, tunah chuan point an hmu ta. Gunners tan point khat hi result ṭha a ni.

Season hmasa mai pawh khan Arteta naute hian champion beiseina an neih lai takin City hi an tlawh a, 4-1 ngawta an tlawm avangin a beiseina a thamral zui a nih kha, an tan phur luattuk avanga Man City nawr chiam a him lo.

Defender laia ding Gabriel leh William Saliba ten an hna an tlin, striker ṭha bik Haaland an chepral thei. Norweigan striker hian vawi khat pawh goal zawnah a pet lo. A sira ding Ben White leh Jakub Kiwior ten an hmaa ding an chhuah duh bik lo bawk, goal hlauhawm an hmachhawn lo tluk a ni.

Arsenal vanneih ṭum ni se chuan chak theihna remchang an nei. Goal luh theihna tura 'chance' siam thei an awm mang loh zanah Saka chuan hun ṭha bik a siam leh zauh, ṭha zet maia a cross chu Jesus-a'n a lo tlawh fuh hman lo hlauh.

Substitute Trossard pawhin counter attack aṭangin remchang a hmu ve bawk, mahse goal zawnah a pet lo. Belgium international forward khan a hun remchang hmasaah Martinelli kha pe se la chuan result a danglam thei hial ang.