Namdhari lakah Aizawl FC an ṭang tluan thei lo

B. Malsawmzuala kaihhruai Aizawl FC chu nimin khan Namdhari Stadium-ah mualneitu Namdhari nen an inhmachhawn a, 1-1 in an inhnehtawk. Aizawl FC-in minute 39-naah R. Ramdinthara (Tharpuia) hmangin goal khung hmasa mah se Namdhari-in minute 85-naah Ivan Garrido Ciaurriz hmangin an sut.

Mizo club hian point thum hmuh theihna hun ṭha an bawhpelh a, point khat chauh an hlawhchhuah avangin pasarihnaa awm Delhi FC chu point liin an pha lo. Aizawl FC-in tun season-ah foreigner an la fuh lo a, nimin inkhelah pawh goalkeeper Nora Fernanez chauh bul ṭantu zingah hnamdang a awm - player dang zawng chu Mizo player an ni.

Aizawl FC hian kuminah match riat chhung chak hmel an hmuh loh hnuah RG Stadium-ah Churchill Brothers 4-0 in an sawp a, hei vang hian Namdhari an hmachhawn turah pawh an inringtawk hle. Tlarhnungah Lalchhawnkima leh Lalmuanawma (Munez) te an inkawp a, mual sirah Lalfelkima leh Lalhrezuala Sailung te an awm. Hun rei tak goal venghim vang mah se a tawpah an ṭang zo ta lo.

Serchhip tlangval Lalrinzuala'n minute 90 chhung a khel chungin goal a khung lo bawk. Aizawl FC striker Rinzuala hian Gokulam Kerala striker Alejandro Sanchez chu goal khat chiahin a pha lo a, inelna pumpuia top scorer ni turin goal khung belh a mamawh hle.

Aizawl FC hian April 5, Zirtawpni zan dar 5:00 hian Churchill Brothers an tlawh dawn a, hemi zawh hian Manipur club pahnih Trau (April 9) leh Neroca (April 12) te an mikhual ang. Mizo club hian match thum chauh khelh tur an nei tawh tihna a ni.

Sreenidi tan Mizo tlangval

Sreenidi Deccan-in Deccan Arena-ah Rajasthan FC an mikhual a, 6-1 zetin an chak. Samlukhai tlangval Lalromawia'n goal hnih a khung bakah Lunglei tlangval Lalnuntluanga Bawitlungin goal khat a khung bawk.

Pathianni zan inkhelah hian Rajasthan player tihsual chu William Oliveira-a'n minute riatna lekah goal hmahruai khung nan a hmang. Minute 15-naah Romawia'n mual dinglamah ball um lutin ṭha zetin a pet lut a, a pettu hi Brandon VL Remdika a ni.

Sreenidi hian chance dang an ngah a, minute 42-naah William Oliveira-a'n goal thumna a khung. An vanneih ṭum chu ni se first half-ah goal ruk chuang khung thei an ni tawh.

Second half-ah pawh Sreenidi bawk an chungnung a, Rilwan Olanrewaju Hassa-a'n kawh zetin a tauh lut. Hemi hnu hian Rajasthan tan Pangambam Naoba Meitei-a'n khung ve mah se mualpho a hliah khuh lo.

Sreenidi tan Mizo tlangval Tluanga'n corner kick aṭangin a pet lut a, injury time-ah Romawia'n ṭha taka la lutin Sreenidi goal rukna a khung a, 6-1 in an chak.

Champion inum

I League-ah Mohammedan SC chu champion tawh tura ngaih ni mah se a la chiang bik lo. Sreenidi-in point 43 an hmu a, match thum khelh hmabaka an chak vek chuan point 52 an hmu dawn. Hyderabad club khingpui tur hi Neroca, Inter Kashi leh Shillong Lajong te an ni.

Chutihrualin Mohammedan erawh an dinhmun a la ṭha zawk tho a, head to head-ah Sreenidi aia an ṭhat zawk avangin match hnih khelh hmabakah point thum hmuh a tawk. Kolkata club hian Shillong Lajong leh Delhi FC te an la hmachhawn ang.