Arteta leh Pep thukhawchang

Arsenal manager Mikel Arteta chuan, "Inkhel hautak tak mai chu dawhthei takin kan khel chhuak. Ka naute khan an tih tur ang dik thlap thlapin an ti thei a, a nihna takah chuan goal khung theihna remchang kan nei ṭha zawk, kan chhawr thei ta lo erawh a uiawm.

"Zawimuangin hma kan sawn zel, hmalam kan panna hi chawlhsan mai loin kan kal zel ang," a ti. Man City nen league match minute 180 an khelhah target zawna shot vawi hnih chiah an hmachhawn a, an tlarhnung a phui ṭha tawk hle.

Arsenal hian Nilaini zanlaiah hian Luton Town an mikhual zui leh nghal dawn. Spanish manager chuan Emirates Stadium-a inkhel tur ni mah se an fimkhur a ngai tih a sawi a, Loton chu team lian dangte harsatna lo thlen tawhtu an ni tih a sawi bawk.

Tun season atan Premier League khelh hmabak la awm aṭangin point hmuh theih 27 lai a la awm, tun dinhmuna a sang zual pathum te hi match khat chetsual lekah an dinhmun a la inthlak thei vek.

Manchester City manager Pep Guardiola chuan, "Ka sawi tawh ang khan tuna champion rinkai ber chu Liverpool an ni, a chhan chu hma hruaitu an ni a, a dawtah Arsenal niin keini chu pathumna kan ni, kan kutah thil a awm lo.

"Tuna kan tih theih chu Aston Villa nen kan inkhelh leh tur atana rilru pek a ni," a ti a, an elpuite boruak a siamsak daih. Man City hian April 3, Nilaini zanah Unai Emery enkawl Aston Villa an mikhual chhunzawm leh nghal ang.