Sinner tan Miami Open nomawi

Jannik Sinner chuan tennis season duhawm a hman mek a chhunzawm. Pathianni zanlaia khelh zawh tak Miami Open final-ah Grigor Dimitrov chu straight set hmanga hnehin a champion.

Australian Open champion lai Sinner hian Miami Open hi kum 2021 leh 2023 khen final a lo lut tawh, mahse a chak lo zawkah a ṭang. Tun ṭumah erawh a khingpui Bulgarian player hi 6-3, 6-1 a hnehin a tan hun ṭha a inher chhuak ve ta.

Italian tlangval hian tun season kal laiah nomawi pathum a chawi ta. Miami Open hma hian Grand Slam hmasa ber Australian Open leh Rotterdam Open title te a lo la tawh bawk a ni.

Kum 22 mi Sinner tan nomawi chawi a ni satliah lo, tun kara world ranking chhuak tharah chuan Carlos Alcaraz khumin pahnihna dinhmun a luah phak tawh dawn, a chungah Novak Djokovic chauh a awm ang.

Tun season chhunga match khat chauh chak loh la nei Sinner chuan, "Ka tan chuan chawlhkar duhawm tak a ni, player hrang hrang khelh dan inang lo tak tak te ṭha takin ka hmachhawn thei vek, ka tan chuan a lawmawm hle.

"Nomawi mai bakah world number 2 ka ni thei tur hi ka lawm, chutihrualin ranking sang nih hi a pawimawh lai ber erawh a ni lo. Mahni ṭhat dan leh nuam tih dan taka khelh chhuah theih hi a pawimawh lai chu a ni," tiin a sawi.

Final-a chak lo zawk Dimitrov tan pawh tournament ṭha tak tia sawi theih a ni ang, final kalkawngah hian Alcaraz leh Alexander Zverev te a hneh thei, kum 2018 hnua a vawi khat nan world ranking-ah pawh a sang zual 10 zingah a tel ve leh thei tawh ang.