Spurs beiseina a la thi lo

Tottenham Hotspur chuan zanin dar 12:45 hian Premier League match khel turin West Ham an lenchilh dawn a, season thara Champions League khelh beisei team tan tlawm a thiang lo - league table-ah pangana an ni mek.

Spurs captain Heung-min Son chuan, "Match kua khelh tur, hmabak hautak em emin min hmuak a, kan chak chuan kan tan a pawimawh dawn hle. Match pawimawh tak a ni a, kan inpeih a ngai a ni," tiin inkhel tur a thlir lawk.

London club hian coach Ange Postecoglou hnuaiah season bul an ṭan ṭha hle - league match 10 a zawnin tlawm an nei lo a, mahse, November leh December-ah khan a zawna match nga chak zawh loh an nei a, hemi hnu hian league match thum an tlawm leh tawh bawk.

Hei vang hian season ṭantira champion sawi ri Tottenham tan season thara Champions League khelh phak chu hlawhtlinna a ni dawn a, palina Aston Villa chu point thumin an phak lo mek - mahse, match khatin an khel tlem thung.

Spurs tan zanin hi Villa lehpel a, European football beiseina chhem nun tharna hun ṭha a ni a, tlawm a thiang lo. Chutihrual chuan David Moyes-a enkawl Hammers hian European football khelh an beisei ve tho tih hriat a ṭha.

London club hi table-ah pasarihna an ni mek a, Premier League table-a parukna chuan Europa Conference League playoff round an khel dawn - hei vang hian Moyes-a'n a naute chakpui ngei a duh dawn.

Hammers hian parukna Manchester United chu point li chauhin an phak lo mek a, match khatin an khel tam thung - an league match hnuhnung pathumah vawi hnih draw-in, vawi khat an tlawm a, zaninah insiamrem an tum ang.