Premier League hmahruaitu chu Liverpool

Pathianni zan khan Liverpool chuan 2-1 in Brighton & Hove Albion an hneh a, a hnu inkhelah Manchester City leh Arsenal te an inhnehtawk bawk avangin Premier League table chung ber an luah.

Anfield-ah Reds-in goal an chhuah hmasa a, striker Danny Welbeck chuan minute hnihna lekah goal hmahruai a khung - Liverpool fan-te thawm a reh.

Mahse, Jurgen Klopp-a nauten ṭum danga an tih ang thoin an bei let a, Luis Diaz leh Mohamed Salah ten goal khat ve ve khungin, a tawpah 2-1 in an chak a, champion an beisei zel.

Barakhaih

Brighton-in Liverpool nena an intawn hnuhnung vawi sarihah vawi khat chiah Reds an ngam lo a, hei vang hian team chhe zawk anga ngaih ni mah se, Anfield-ah boruak an ngam.

Inkhel ṭan aṭanga minute hnihna lekah Welbeck chuan Liverpool defender talbuai karah goal hmahruai a khung nghal a, Anfield a reh duk - an chak loh chuan champion tura an elpui Arsenal leh City chance a ṭha dawn lutuk!

Liverpool-in a na thei ang berin an nawr let zui a, Salah chuan first half chhung ringawtin vawi sarih 'shot' a nei a, mahse, Brighton keeper Bart Verbruggen a paltlang thei tlat lo.

Champion zia

Reds-in goal an chhuah hma a, an vanneihna chu chawlhlawk hmaa an chhanglet hman chu a ni. Minute 27-naah Luis Diaz a inlar a, Colombian forward hian hnai set sawt aṭangin si phurh sutna goal hi a khung.

Liverpool-in 1-1 in chawlhlawk an hmang a, second half-ah mamawh chhanna Salah a inlar. Egyptian forward hian Alexis Mac Allister-a siamsak chu chakna goal ni turin a khung a, Salah a la 'class' reng e.

Reds tan Diaz chuan a khung belhah inngai mah se, sawisel theih takin offside vanga pawm a ni lo a, Brighton pawhin chance an nei - captain Lewis Dunk chu Reds keeper Caoimhin Kelleher chuan vawi hnih ngawt a dansak a, Liverpool player hlui Adam Lallana chuan a hun ṭha neih a khawhral bawk.

Klopp & De Zerbi

Xabi Alonso-a'n Liverpool a hnar a, Brighton coach Roberto de Zerbi chu Reds nen an sawizawm nasa lehzual sawt - inkhelh zawhah Klopp-a'n De Zerbi hi a kuah vawng vawng a, coach pahnihin an inzahna an lantir.

Klopp chuan, "De Zerbi hnenah khan football khawvel chu hmuhnawm ti taka min thlirtir zel turin ka hrilh a, a hnathawh hi ka zah em em - ngaisang tak chungin ka lo thlir zel ang," a ti.

De Zerbi-a enkawl Brighton laka a vawi khat nana chak Klopp chuan, "De Zerbi enkawl team kan hmachhawn ṭuma kan khelh ṭhat ber kan khel a, ka lawm hle," a ti a, an chak thei chu a lawm thu a sawi.