Lawngtlaiah MFA Cup vawi 22-na khelh a ni dawn

Mizoram Football Association hnuaia district hrang hrang club inelna MFA Cup vawi 22 chu Lawngtlai District Football Association-in a thleng dawn a, April 3-13, 2024 chhung hian khelh a ni ang.

MFA Cup-ah hian MFA hnuaia district champion ṭheuh an tel a, MPL club an tel thei lo thung. Kumin hian club-ten loan hmangin player pathum ṭheuh an la thei a, an player lakte erawh MPL leh a chunglama mi an ni thei lo.

Aizawl DFA champion FC Bethlehem-in player an inla belh a nih chuan ADFA First Division leh Second Division aṭangin an la thei tihna a ni a, District dang player an la thei bawk.

Team 11 te hi group hnihah ṭhen an ni a, group A-ah inelna thlengtu Lawngtlai FC aiawh MLS FC, Hmar Veng FC (Mamit), Saidan GSA (Kolasib), Model United FC (Siaha), Vengthar FC (Khawzawl) leh FC Serchhip Kawnpui (Serchhip) te an ni.

Group B-ah Venglai FC (Lunglei), FC Bethlehem (Aizawl), Bethel FC (Champhai), Venghlun FC (Keifang, Saitual) leh Chanmari FC (Hnahthial) te an awm thung. Group khat aṭangin team pahnihin semifinal an lut dawn.

Inelnaah hian group pathum CYLA Playground, YLA Ground leh Vengpui Ground-ah te khelh a ni dawn. Semifinal leh final hi CYLA Playground-a khelh tur a ni. MFA Cup-ah hian TMFC, Melbuk chu champion lai an ni a, nikum khan final-ah Khawzawl Vengthar GSA chu 1-0 in an hneh.