Arsenal leh City inlan zan - boruak a 'hot' zel
Premier League-ah champion tum team pathum an la awm a, an hming chu Liverpool, Arsenal leh Manchester City a ni - kartawp inkhelah Arsenal leh City intawngin, Liverpool lawm nan an inhnehtawk.
Team pahnih inhnehtawk vangin a chung berah Liverpool an awm a, point 67 an nei mek - pahnihna Arsenal hian point hnih chauhin an phak lo a, City chuan point thumin Merseyside club hi an phak lo bawk.
A tawi zawnga sawi chuan match khat lekah team pathum dinhmun hi la inthlak hlawk thei a ni a, uang thei bik an awm lo - zaninah Arsenal leh City-in match khelh tur an nei ve ve a, Liverpool erawh Ningani zanah an inlan ang.
Arsenal hian zanin dar 12:00-ah Luton Town an mikhual dawn a, City hian season thara Champions League khelh tum Aston Villa chu zan dar 12:45-ah an mikhual dawn thung - zanin result hre sa chungin Reds chuan Ningani zanah Sheffield United an mikhual ve dawn chauh.
Arsenal an hlawhtling
City khelmuala City leh Arsenal inkhelh ṭumin goal a lut lo a, a tawi zawnga sawi chuan team pahnih inkhel hi attacking football hmuhnawm tak beiseitu tan chuan 'beisei bo' a ni - mahse, Arsenal an tumah an hlawhtling.
Gunners-in khualmualah City an chelh tluan a, Etihad Stadium-a match sarih zet a zawna tlawm tawh team tan chuan inchhuanna tham a tling. Zanina Luton Town an hmachhawn hunah point thum hlawhchhuah ngei tumin an bei zui ang.
Chutihruala hriat tel ngai chu Luton hi chetsual theihna an ni. He team hi relegation zone-ah an awm mek a, a him china awm, an chung chiaha mi Nottingham Forest nen an point hmuh zat a inang.
Luton-in Premier League inhamtan ngei an duh a, hei vang hian Arsenal tan tawh an khirh dawn - chutihrual chuan Gunners hi mahni muala inkhel tur an ni a, an hlauthawng lutukin a rinawm lo.
Hahdamna
Premier League fixture a tawt takzet a, Arsenal tan pawh a harsa. Gunners hi zaninah an inkhel zo ang a, Inrinni zanah league match khel turin Brighton & Hove Albion an lenchilh zui ang a, Thawhlehni zanah Bayern Munich nen Champions League quarterfinal an khel zui dawn bawk!
Mikel Arteta tan fimkhur taka player siksawi thiam a ṭul dawn tihna a ni a, coach ṭha a nih leh nih loh fiahin a awm chho tak tak dawn - Bukayo Saka chu chawlh hahdamtir a nih a rinawm a, a hmun ruakah Leandro Trossard awm tura ngaih a ni.
Kai Havertz-a'n chawlh hahdam a mamawh a, chuti a nih chuan tlarhma laiah Gabriel Jesus a awm thei ang. Takehiro Tomiyasu leh Thomas Partey te pawh bul ṭan tura beisei an ni a, Ben White leh Gabriel Magalhaes te an chawl hahdam a nih pawhin a mak lo ang.
Oleksandr Zinchenko pawhin bul a ṭan ve leh thei tawh tura ngaih a ni a, Arteta player rem dan tur hmuh a châkawm ta hle - Arsenal hian an intawn hmasakah Luton hi 4-3 in an hneh hram tih hriat a ṭha.
City hi
Pep Guardiola an neih hnuah City-in Premier League an thunun a, mahse, an nomawi humhim lo thei dinhmunah an ding mek - zanina an hmachhawn tur Villa hi rin phak baka season hmang ṭha an ni a, City tan hna a harsa dawn.
December 6 khan Villa khelmualah City hi lengin, 1-0 in an tlawm a, Unai Emery enkawl team lakah inchhuang thei an awm lo. Tun season-a 'big six' an tum hrim hrimah Manchester khaw club hian beisei an phak lo bawk.
Arsenal nen vawi hnih an intawn tawhah point khat chiah an la hlawh chhuak a, Liverpool leh Chelsea nen vawi hnih an intawnah an draw ve ve a, Tottenham Hotspur chu vawi khat tawng tawhin, an inhnehtawkpui.
Big Six zinga tun season-a an la hneh awmchhun chu Manchester United an ni a, tun season Premier League top five team zingah City hian hneh an la nei miah lo tihna a ni - Villa-in an hlau bik lo ang.
Inren a ngai!
Arsenal ang thoin City-in buaina an nei - chu chu an fixture tawt ve tho hi a ni. Inrinni zanah league match khel turin Crystal Palace an lenchilh zui dawn a, Thawhlehni zanah Champions League quarterfinal khel turin Real Madrid khelmualah an leng zui ang!
City tan hliam vanga chawl mek goalkeeper Ederson leh defender Kyle Walker an la inlan thei dawn lo a, Arsenal lakah John Stones chu rin loh takin bench-ah lo kir mah se, bul ṭan nan chuan a la hma hret mai thei.
Hetihlai hian Gunners lakah hliam vangin Nathan Ake lakchhuah a ṭul bawk a, chuti a nih chuan English rawlthar ṭhangduang Rico Lewis tan bul ṭan a ṭul dawn tihna a ni a, Jeremy Doku leh Jack Grealish te pawh bul ṭantir an nih a rinawm.
City tana thu lawmawm erawh Villa striker Ollie Watkins a inlan thei lo mai thei. England international hi Wolverhampton Wanderers laka an chak ṭumin kar hmasa khan hliam vanga lakchhuah a ngai a, tun season inelna hrang hranga goal 22 khung tawh Watkins tel loin Villa tlarhma a bil sawt ang.