Lianzuala'n goal a khung

Indian Super League Golden Ball kawl mektu Lallianzuala Chhangte chuan goal a khung leh ta - Thawhṭanni zan khan Lianzuala khelhna Mumbai City chuan 3-0 in Hyderabad FC an sawp a, Lunglei tlangval Lza hian goal hmahruai a khung.

Minute 16-na lekah Lianzuala hian goal a khung a, Vikram Partap Singh-a ball pek ṭha tak chu Lunglei tlangval hian um lutin, 'cool' zetin goal-ah a chantir a, Hyderabad an inring hman lo.

Mumbai tan Mehtab Singh chuan minute 31-naah a belhchhah a, Jorge Pereyra Diaz chuan minute 90-naah penalty hmangin a khung bawk - Mumbai an chak a, ISL table chung bera an dinhmun an sawhnghet zel.

Hyderabad tan Jeremy Zohminghlua, Mark Zothanpuia, Lalchhanhima Sailo leh Ramhlunchhunga ten inkhel bul an ṭan a, Aron Vanlalrinchhana chu bench aṭangin a lut bawk - Mumbai tan Lza bakah defender Hmingthanmawia Ralte chuan inkhel bul a ṭan.

Lianzuala hian season hmasa khan match 22-ah goal 10 khungin, assist vawi ruk a nei a, Mumbai hi champion pui zo ta chiah lo mah se, Hero of the League atan thlan a ni a, Sunil Chhetri tih lohah chuan Indian player zinga ISL Hero of the League ni thei hmasa ber a ni.

AIFF Player of the Year ni bawk Lianzuala hian season ṭantirah season hmasa a khelh dan phak chiah lo mah se, a vul leh ṭan mek - tun season-ah league match 20 khelin goal nga a khung tawh a, assist vawi nga a nei bawk.

Lianzuala chuan, "Pathian khawngaihna leh awmpuina ka chang ṭhin a ni. Season hmasaa ka goal khung zat phak ngei ka tum - game pawimawh tak tak a la awm nual a, team tana danglamna thlentu nih ngei zel ka tum," tiin Vanglaini a hrilh.

Lunglei tlangval chuan sawi zawmin, "Season ka hman tawhah chuan hautak ber pawl a nih ka ring a, mahse, Pathian malsawmna, team inpumkhatna leh team thawhrimna avangin table-ah hmahruaitu kan la ni hram hram.

"A tawp thlenga ka awm hram ka beisei a, nomawi chawi ngei ka duh," a ti a, Mumbai City tan ISL nomawi chawi a tum - Lza hian season hmasa khan Mumbai hi ISL table chung berah league round a kharpui a, mahse, semifinal-ah Bengaluru ngam loin an tla.

Chennaiyin chu 2019-20 season khan final a luhpui a, mahse, a vanduai zawkah an ṭang - Durand Cup 2022-ah Mumbai hi pahnihna a nihpui bawk a, Lza'n club football-ah nomawi chawi a la neih loh avangin tun season-ah an champion chuan a tan a hlu lehzual ang.