Vawiin aṭangin MFA Cup ṭan dawn

Mizoram Football Association hnuaia district hrang hrang club inelna MFA Cup vawi 22 chu vawiin aṭangin Lawngtlaiah khelh a ni dawn. Inelna hi Lawngtlai District Football Association-in an thleng a, April 3-13, 2024 chhunga khelh zawh tur a ni.

MFA hnuaia district 11 ten team an tir thei vek a, champion lai TMFC, Melbuk chu kuminah Champhai DFA aiawhin an tel pha tawh lo. CDFA-in Bethel FC an tir a, anni hian vawiin tlai dar 3:00-ah Aizawl District FA first division champion FC Behthlehem an hmachhawn ang.

Inelna hi group pathum YLA Ground, Vengpui Ground leh CYLA Playground a khelh a nih dawn avangin ni khatah match nga zel a awm dawn a, round khat khelh zawh zel a ni dawn. Chutihrualin group B-ah team panga an awm avangin round tinin team pakhat an awl dawn a, Hnahthial club Chanmari FC chu awl hmasa ber tur an ni.

Serchhip aiawha tel FC Serchhip Kawnpui hi coach Lalrempuia kaihhruai a ni a, tun season-ah match 24 chhung hneh loh an tawng tawh lo. Serchhip chhunga inelna pathum LZ Chhangte Football Festival, Assam Rifle buatsaih Mizoram Open Football C'ship leh Serchhip District Football C'ship-ah te an champion vek a, MFA Cup-ah champion an tum hle. Kolasib club Saidan GSA lakah fiahna an hmachhawn ang.