Alonso leh Leverkusen an ropui zel dawn em? Zanin dar 12:15-ah DFB Pokal semifinal

Bayer Leverkusen-in tun season-ah hneh loh an la tawng lo a, match 39 chhung chak loh nei loin an kaltluang tawh. Tunah chuan season tawp lam an hnaih tawh a, an record hi a chhunzawm zel theih chuan nomawi an chawi thuai dawn.

Zanin dar 12:15 hian Bayer Leverkusen-in an mual BayArena-ah Dusseldorf nen DFB Pokal semifinal an khel dawn. Bundesliga table aṭanga thlirin Leverkusen hi chak tur zawka ngaih an ni a, an muala khel tur an nih bawk avangin final lut turin an dinhmun a ṭha hle.

Nomawi a hnai

Xabi Alonso hoin Bayer Leverkusen-in season ṭha bik an hmang a, Bundesliga-ah Bayern Munich lak aṭangin champion nomawi an chhuhsak hnai. German Cup-ah pawh Leverkusen dinhmun a ṭha - semifinal lut zingah anmahni chiah Bundesliga club an ni tawh.

Bayern khingpui tur Fortuna Düsseldorf hi 2. Bundesliga-ah pathumna an ni mek a, season thara Bundesliga khelh beiseina sang tak an nei. Chutihrualin German Cup semifinal thleng tur hian an fixtures a fuh ve bawk.

First round-ah German fourth division club FV Illertissen chu 3-1 in an hneh a, second round-ah pawh third division club SpVgg Unterhaching chu 6-3 in an hneh a, chiang taka chak angin lang mah se extra time an khelhpui.

Round of 16-ah anmahni ang bawka 2. Bundesliga club FC Magdeburg chu 2-1 in an hneh a, quarterfinal-ah German second divison club tho FC St. Pauli nen hun pangngaiah 2-2 a inhnehtawkin penalty shootout-ah 4-3 in an vannei.

Düsseldorf hian Bundesliga club hmachhawn miah loin semifinal an thleng a, an vannei. Chutihrualin Leverkusen pawh an vannei ve tho a, semifinal-a 2. Bundesliga club an chang hi chanchin lawmawm a tling. Leverkusen hian kum 1993 khan DFB Pokal-ah a vawi khat nan an champion a, hemi hnu hian an la champion leh miah lo. Kumin hi Leverkusen tan hun ṭha a ni.

Season duhthusam chu?

Bayer Leverkusen hian season tawpah Bundesliga bakah DFB Pokal leh Europa League nomawi an chawi theih chuan season duhthusam tia sawi theih a ni ang. Chutihrualin tuna an thlen chin ringawt pawh hi a ṭha tawh hle.

Leverkusen hian nipui bazar an hmang ṭha a; tun season-a player pawimawh Álex Grimaldo, Jonas Hofmann, Granit Xhaka, Victor Boniface, Josip Stanisic (loan) leh Nathan Tella te hi nipuia an lakluh a ni.

Alonso hian a mamawh tur a hrechiang a, chutihrualin nipui bazara euro maktaduai 90 vel zet an hman avangin Leverkusen pawhin Spanish manager hi an ringtawk tih a lang bawk.

Leverkusen ṭhatna chu kil tin aṭangin goal an khung a tih theih. Tun season-ah player 17 zetin goal an khung tawh a, goal khung tam ber Victor Boniface-a'n goal 16 a khung tawh. Player pali Álex Grimaldo, Florian Wirtz, Jeremie Frimpong leh Patrik Schick ten goal 11 ṭheuh an khung tawh.

Goal nga khung tling player paruk Jonas Hofmann (7), Adam Hložek (7), Amine Adli (7), Jonathan Tah (6), Nathan Tella (6) leh Exequiel Palacios (5) an la awm cheu. Hei hian Leverkusen player-ten season an hman ṭhatzia a sawifiah.

Leverkusen hian goal an khung bakah goal an venghim ṭha a, Bundesliga-ah goal 19 chauh an chhuah. An elpui Bayern Munich-in khelh zat inangah goal 45 an chhuah a, hei hian Alonso hnathawh ropuizia a tichiang viau bawk.

Thlirna hrang hranga tehin Bayer Leverkusen hi chak tura ngaih an ni a, chutihrualin knockout football-ah chuan engpawh a thleng thei. Record nei ṭha ber Bayern Munich hneh loh pawh third division club Saarbrucken a ni a, Leverkusen hi chesual ve thei tho an ni.