Number 1 ni thei upa ber Djokovic

Novak Djokovic chu Association of Tennis Professionals (ATP) ranking-a number 1 ni thei upa ber a ni. Serbian star hian Roger Federer-a record, kum 36 leh ni 321 mi ni chunga number 1 nihna chu a rawn khum ta chiah.

Nimin tlai khan world ranking thar hi tih chhuah niin, a chung berah Djokovic hi a awm chhunzawm. Grand Slam vawi 24 champion tawh hian chawlhkar 419 chhung tehmeuh number 1 dinhmun a luah ta a ni, a hnungah hian Jannik Sinner a rawn awm ta chiah.

Kum 2011 July 4 khan a vawi khat nan Djokovic hi number a ni a, a elpui ṭha Federer leh Rafael Nadal te bakah Andy Murray ten a chung berah an lawn chhawk zak zak a, tun hnaiah Carlos Alcaraz chu a rawn dawk chhuak bawk, mahse tunah chuan a hmun ngaiah a awm leh rih a ni.

Tun dinhmunah chuan Djokovic hi inkhel loin a chawl mek. Indian Wells-ah beisei a phak loh hnuin Miami Open aṭangin a inhnukdawk a, tunah chuan clay court inelna lian - May thla chawhnu lama khelh tur French Open atan rilru a hman ṭan a ngai tawh ang.

Djokovic hnung zuitu Sinner hian chanchin danglam tak a nei. Mipa tennis world number 2 a ni tawh a, a inkhelhna leh sumdawnna aṭangin sum tam tak a lalut tawh. Heti chung hian a nu leh pate chuan an eizawnna pangngai an la chhunzawm zel.

Italian tlangval Sinner-a hi chhungkaw harsa ve tak aṭanga seilian a ni a, a pa hi thingpui dawra thawk niin chutah chuan a nu pawhin a pui ṭhin. An eizawnna an zahpui lo a, an fapa in sum a lakluh hnem hnuah pawh nunphung thlak nghal vek an tum lem lo a ni.

World number 2 thar Sinner chuan, "Chhungkaw pangngai aṭanga rawn seilian mai kha ka ni a, mi ropui kan ni lo. Tun thleng hian ka nu leh pa te pawhin hna an la thawk reng, kei pawhin nitin hian theihtawpin tennis ka khel ve reng bawk.

"Ranking sang nih hi ka chak ve ṭhin a, number 1 nih te hi ka duhthusam leh suangtuahna a ni ṭhin, tuna number 2 ka ni ve ta mai hi a lawmawm pawh ka ti, chutihrualin ka sawi tawh ṭhin angin a pawimawh ber chu ṭha taka khelh a ni," a ti.

Miami Open khelh zawh takah Sinner hian Grigor Dimitrov hnehin nomawi a chawi a, tun season chhungin Australian Open leh Rotterdam Open nomawi te a lo chawi tawh bawk a, chak loh vawi khat chiah a la nei hial.

Kum 1973 aṭangin mipa tennis thuneitu sang ATP chuan world ranking a siam ṭan a, tun thlengin Italian tlangval zingah Sinner hi number 2 ni phak hmasa ber a ni, tun ang zela a kaltlang a nih chuan a sang bera lawn turin theihna a nei.

ATP ranking chhuak tharah hian Sumit Nagal pawhin hma a sawn, Indian tlangval hi world number 95 niin a tawn san lai ber a ni - kumin February thla khan 97-na dinhmun a lo luah tawh bawk.