F1 neitu kutah MotoGP a lut

Formula 1 neitu Liberty Media chuan MotoGP chu an nei leh ta, khawvela bike intlansiakna sang ber hi pound vaibelchhe 3.6 zetin neitu nihna an lei a ni.

US media pawl pakhat Liberty Media hian intlansiak khawvel an luhchilh nasa, car intlansiakna sang ber an neih hnuah pawh an la duhtawk mai lo a, tunah chuan bike an luhchilh leh ta.

MotoGP hi Dorna Sports kuta awm a ni - Spanish company hian kum 1992 aṭang khan an lo nei tawh, tunah chuan Liberty Media hian 86% an nei dawn a, a dang la bang hi Dorna chan a ni thung ang.

Indawrna hi a kaltluangin an inrem tawh a, chutihrualin inremna zawng zawng erawh kumin kum tawpah hian ziah fel kim hman tura tih a ni thung, season tharah chuan MotoGP hmel thar kan hmu ngei dawn.

Liberty Media president leh chief executive officer ni bawk Greg Maffei chuan, "MotoGP hi khawvel pumin a ngaihven leh dahsan a ni a, hmun tinah ngainatu leh ṭantu an awm ṭha hle.

"Infiamna mai bakah sumdawnna kawngah pawh hmalam panin a kal, thawhpui ṭha leh duhawm tak tak a nei tam em em bawk, heng hote nena kan inzawm thei hi thil lawmawm tak a ni," tiin a sawi.

Liberty Media hian intlansiak an ngaina a, khawvel hmun hrang hrangah a tam thei ang ber inelna neih tumin hma an la ṭhin - Formula 1 pawh season khat chhunga an tlan ber ber ṭum (24) an buatsaih mek.

F1 ang bawkin MotoGP pawh hi a darh zau thei anga kalpui an tum tih a chiang nghal a, sawiselna leh fakna thawm a in rik chhawk leh nawk dawn tih a chiang, a hmasawn zawnga an kalpui leh ngei a rinawm.

Dorna chief executive officer Carmelo Ezpeleta chuan, "Liberty hian intlansiakna tlan kawngah sulhnu an nei ṭha takzet. Hun rei tak chhung khawvel huap inelna kan buatsaih tawh, tunah chuan thin inher danglam hun kan tawng ve mek a ni," tiin a sawi.

MotoGP hi kum 1949 aṭanga tlan ṭan tawh kha a ni a, a tirah chuan season khatah intlansiak paruk chauh a awm. Tunah chuan khawmualpui pangaah intlansiak vawi 20 an nei tawh a ni.

Tun season MotoGP-ah chuan Spanish rider Jorge Martin-a'n point 60 hmuin hma a hruai mek, pahnihna chu South African tlangval Brad Binder (42 points) a ni thung.

Kuminaah intlansiak pahnih Qatar Grand Prix leh Portuguese Grand Prix an tlan tawh. April 15, Pathianni zanlaiah a pathumna atan Grand Prix of the Americas an tlan leh dawn a ni.