AFC 'C' Diploma Coaching Course an zo fel

All India Football Federation leh Mizoram Football Association ṭangkawpin a buatsaih Asian Football Confede-ration 'C' Diploma Coaching Course chu March 22 - April 1, 2024 chhung khan Regional Sports Training Centre, Saidan Kolasib-ah neih a ni a, AIFF 'D' Licence coach mi 24 an tel a ni.

AFC 'C' Diploma Coaching Course hi instructor Nishant Singh hnuaiah neih a ni a, course chhim tur hian AIFF 'D' Licence neih a ngai. Mizoram hmun hrang hrang aṭangin coach-te hi an kalkhawm a, MFA-in D Licence nei zinga Mizoram tana sulhnu nei ṭhate a duhsak.

Course kharna hun hi April 1, Thawhṭanni khan neih a ni a, hun hmanpuitu MFA treasurer Tuikhuahthanga chuan course sponsor-tu Mizoram Youth Commission chungah lawmthu a sawi a, engkim lo ruahman feltu Kolasib District Football Association chungah lawmthu a sawi bawk.

MFA assistant secretary Lalrawngbawla chuan MFA-in kum thum chhungin vawi sarih coaching course a buatsaih thu a sawi a, Mizoram football-in a hlawkna an tel ngei a beisei thu a sawi.

Course chhimtute hian theory leh practical exam an hmachhawn a, heta pass-te hian AFC C Licence an nei thei ang. Tun ṭumah hian Mizo professional footballer hmasa ber S. Malsawmtluanga bakah MPL coach langsar H. Lalrindika, Santosh Trophy champion ṭuma final-a goal khungtu F. Lalrinpuia (Valpuia), Mizoram team vawi tam hruai tawhtu Anand Gurung leh First Division-a FC Bethlehem champion puitu Lalhriatpuia te chu a langsar an ni.