Linkin Park leh an bassist hluiin inremna siam ta

Linkin Park bassist hlui, Kyle Christner-a'n royalty pe lo nia puh chungchanga a band hlui a khinna thubuai chu an chingfel thei ta. Inremna an siam dan tak erawh tarlan a ni lo.

Kyle Christner hian nikum November thlaa Linkin Park-in 'Hybrid Theory' an tihchhuah nawn lehah khan demo leh track eng emaw siamnaah a tel ve a, mahse, sum erawh pek a ni ve lo tiin a band hlui hi a khing a ni. Hun eng emaw chen an buai hnuah, an bassist hlui nena an buaina hi an chingfel thei ta tih band chuan thuchhuah siamin an tarlang. An thuchhuahah hian, 'Kyle hi musician talent nei ṭha tak, kum 1999-a Linkin Park tan pawha mi pawimawh tak a ni," tiin, show eng emaw zat leh record label showcase-ahte pawh band tan a perform a, hla siam leh peform-na kawngah pawh a pui nasa a, heng zingah hian Hybrid Theory EP-a hla ṭhenkhat pawh a tel a ni, an ti.