Man United UCL beiseina tiṭhuanawp theitu Chelsea

Manchester United-in zanin dar 12:45 hian Chelsea hmachhawn turin Stamford Bridge an tlawh dawn. Erik ten Hag-a hoten season thara Champions League khelh an la beisei a, Mauricio Pochettino hoten Man United beiseina an tiṭhuanawp thei thung.

Premier League-ah Manchester City, Arsenal leh Liverpool ten champion nomawi an inchuh a, club pathumte hian season tharah Europe-a inelna sang ber Champions League an khel vek dawn. Hmunruak pakhat a la awm a; Tottenham Hotspur, Aston Villa leh Man United ten an inchuh thung ang.

Chelsea ve thung

Big 6 club zinga chhiar tel Chelsea-in neitu thar Todd Boehly hnuaiah sum ṭhahnem tak hmang mah se beisei ang result a nei ṭhin lo. Tun season-ah pawh team enkawl turin Mauricio Pochettino lalut mah se season thara Champions League khelh beisei ngam chi a ni tawh lo.

Chutihrualin Poch-a hote hi tun dinhmunah top 10-ah pawh awm pha lo mah se Europa League an la beisei thei thung. Chelsea hian ṭan chhan an la nei a, mahse club lian tan Europa League emaw Europa Conference League emaw khel tura tha tawp a harsa ṭhin.

Blues tan Premier League an khelh chhiat vanga mualpho hliah khuh nana Man United hneh chu an tih makmawh a ni a, Stamford Bridge-ah an inkhelh dawn avangin chak hi a beisei ngam bawk.

Mahse, an mualah hian player 10 nena hun tam zawk khel Burnley nen an inkhel tawk a, a tawpah 2-2 in an inhnehtawk. Clarets laka an khelh dan aṭanga thlir chuan Poch-a hote tan insiamṭhatna tur a tam a, chutihrualin an khingpui tur Man United pawhin Brentford lakah point khat a hlawh chhuak ve hram tih hriat a ṭha.

Chelsea-in sum an hman tam ngaihtuahin player khel ṭha an nei meuh lo a, tun dinhmuna fak tlak chu Cole Palmer chauh tiin a sawi theih hial. Manchester City aṭanga London club zawmtu Palmer hian tun season-ah goal 16 a khung tawh a, club top scorer a ni mek.

Man United laka chak turin Palmer chet ṭhat ringawt a tawk dawn lo a; Enzo Fernandez, Moises Caicedo; Raheem Sterling, Mykhailo Mudryk leh Nicolas Jackson te pawhin an theihna anga an khelh chhuah a ṭul ang.

A danglam tam lo

Man United-in Erik Ten Hag-a hnuaiah League Cup nomawi an chawi nghal a, FA Cup-ah pahnihna an ni a, Premier League-ah pathumna a ni bawk. Tun season-ah Dutch manager chungah beiseina sang tak nei mah se Champions League-ah an tla nghal a, an group-ah a mawngphahah an awm avangin Europa League pawh an khel pha lo. League Cup-ah nomawi hum thei loin fourth round-ah an tla a, Premier League-ah champion beisena a tawpna a rei tawh.

Chelsea ang thoin tun season-ah chhuan tur an nei meuh lo a, Blues-in Cole Palmer an fak chiam angin Kobbie Mainoo chu hahipin an fak a, English midfielder pahnih hi an theihna a sang ve hrim hrim bawk. Man United tan Rasmus Hojlund leh Alejandro Garnacho ten beiseina siam ve ṭhin bawk mah se an kum a la naupan avangin match tina che ṭha thei an la ni lo.

Ten Hag-a hote harsatna belhchhah turin defender pahnih Lisandro Martinez (chawn) leh Victor Lindelof (malpui) ten hliam an nei a, thla khat chhung an chawlh a ṭul dawn. Left back pahnih Luke Shaw leh Tyrell Malacia te an la inhliam mek. Real Madrid aṭanga Man United zawmtu defender Raphael Varane pawhin tun hnaiah 'concussion' in a taksa a khawih chhiat thu a sawi a, a fapa kum sarih pawh football a khelhin ball tauh lo turin a hrilh thu a sawi.

Inhliam vangin Man United an buai a, chutihrualin Chelsea pawhin hliam vang thoin Reece James, Wesley Fofana, Romeo Lavia, Lesley Ugochukwu leh Christopher Nkunku te an chhawr thei dawn lo.

UCL beiseina a chau

Man United elpui Tottenham chuan West Ham lakah point hnih an hloh a, Aston Villa hian nizan khan Manchester City an hmachhawn bawk. Spurs leh Villa te hian champion inchuh Man City, Arsenal leh Liverpool te an la hmachhawn dawn avangin point nga aia tam chu an la hloh ngei dawn.

Chutihrualin Man United hian Liverpool leh Arsenal te an la hmachhawn ve dawn bawk a, match khatin khel tlem mah se Villa leh Spurs an phak lohna hi point 11 leh point kua a la ni tho a, Ten Hag-a hoten season thara Champions League khelh an duh chuan chetsual a thiang tawh lo. Man United hian Chelsea zawhah Liverpool an hmachhawn lehnghal dawn a, hmabak a harsa dawn hle.