Isaka a che ṭha zel

Indian football-ah, "Tu nge Isak Vanlalruatfela?" tia inzawh a ngai ta lo - Thingsulthliah/Bawngkawn tlangval hian Thawhlehni zan khan league-ah goal a khung a, Odisha FC chu Punjab FC lakah 3-1 in hnehna a chanpui.

Odisha tan Diego Mauricio chuan minute 34-naah Jerry Lalrinzuala ball cross chu a tauh lut a, minute li hnuah Punjab FC-in Madih Talal hmangin an si phurh hi an sut.

Mahse, Isaka'n minute 61-naah chiang zetin an hmahruai nawnna goal a khung a, Mauricio chuan minute 68-naah a belhchhah ve leh bawk - hun tawp thlengin goal dang a lut tawh lo a, 3-1 in Odisha an chak.

Odisha tan Jerry Lalrinzuala, K. Lalṭhathanga (Puitea), Isaka leh Jerry Mawihmingthanga ten inkhel bul an ṭan a, Punjab lamah Mizo player inlan an awm lo thung - Isaka hian tun season inelna hrang hrangah match 32 zet khel tawhin goal ruk a khung a, assist vawi li a nei bawk.

ISL bikah match 20 aṭangin goal thum a khung a, assist vawi thum a nei bawk. Isaka chuan, "A hmasa berah chuan Pathian hnenah lawmthu ka sawi a, mihring rilru hi chu hmanhmawh hret ṭhin mah se, hun a tih takah min tihsak ṭhin tih ka hre chhuak ṭhin," a ti.

Isaka chuan, "Hetiang ang taka season hman ṭhat hi ka inbeisei phak lo a, mahse, a hma ai zawnga che ṭha leh hmasawn tur chuan season ṭantir aṭang khan ka bei ve a ni. Hetiang ang taka match khelh tamte hi ka beisei lo a, ka tan chuan season ropui tak a ni.

"Pathian leh hotute duhsakna zarah first XI ka chang ve reng a, Super Cup, ISL leh AFC Cup khel kan nih avangin kan zin kual nasa a, a chauh thlak ṭhin. Mahse, a tawp thlenga ṭha taka khelh ka tum a, Pathian leh ka chhungte ṭawngṭaipuina zara ka phu loh malsawmna ka dawng ṭhinte hi ka lawm em em a ni," tiin Vanglaini a hrilh.