Liverpool khelmualah Sheffield leng dawn

Premier League hmahruaitu Liverpool chu zanin dar 12:00 hian league match khel turin an inlan dawn a, Sheffield United an mikhual dawn - anmahni hnaihtu Arsenal leh Manchester City te nen vawi khat chetsuala la inlehpel thei vek an nih avangin Reds tan fimkhur a ngai dawn.

Liverpool boss Jurgen Klopp-a'n a elpui Mikel Arteta leh Jurgen Klopp ang thoin harsatna a nei a, chu chu fixture tawt lutuk chu a ni. Pathianni zanah Manchester United chu khualmualah an lenchilh zui dawn a, a kar leh Ningani zanah Atalanta nen Europa League quarterfinal an khel zui dawn bawk!

Hliam vanga player chhawr theih loh ngah em em Klopp-a'n fimkhur taka player a siksawi a ṭul dawn tihna a ni a, zanina an mikhual tur Sheffield hi league table mawngphah luahtu niin, Klopp-a'n a neih ṭhat ber ber a thawhchhuahpui kher lo mai thei.

Hetihlai hian Reds-in an player inhliam chungchangah chanchin lawmawm hriat tur an nei a, Curtis Jones chuan training a zawm leh tawh - Sheffield lakah bul a ṭan ang em, tih erawh sawi thiam a harsa.

International break-a inhliam, left back Andrew Robertson chu a lo kir thei tawh dawn a, Brighton & Hove Albion an hneh ṭuma bench-a awm Ibrahima Konate pawhin khelmual a lut ve leh thei tawh ang.

Ryan Gravenberch, Harvey Elliott leh Cody Gakpo te pawhin Sheffield lakah bul an ṭan a beiseiawm a, hetihlai hian Dominik Szoboszlai, Luis Diaz leh Darwin Nunez te erawh chawlh hahdamtir an nih a rinawm mah zawk.

Reds player zingah Alisson Becker (malpui), Trent Alexander-Arnold, Diogo Jota, Joel Matip, Ben Doak (khup vek), Thiago Alcantara (tihrawl) leh Stefan Bajcetic (kerek) te chu hliam vanga la chawl mek an ni a, an tel loa chak zir zel Liverpool tan a pawimawh ang.