UCL khelh tum Spurs an chelh

Tottenham Hotspur chuan season tharah Champions League khelh tum viau mah se kawng a awlsam dawn lo. Thawhlehni zan Premier League inkhelah Spurs hi West Ham United nen 1-1 in an inhnehtawk.

Ange Postecoglou-a enkawl North London team hian inkhel thunun viau mah se goal an khung tam thei bik lo a, point khatah an lungawi a ngai. EPL match 30 aṭangin point 57 an hmu a, an chunga awm palina Aston Villa chu point hnihin an phak lo.

Inhnehtawk

London Stadium-a inkhelah Brennan Johnson chuan minute ngana lekah hnaite aṭangin goal a khung a, minute 19-naah mualneitu lam tan Kurt Zouma-a'n corner aṭanga ball kal a tauh lut, goal dang a lut zui tawh lo a ni.

Spurs hian ball possession 68% zet an nei a, mahse a tir lama Johnson khung bak chu goal hlauhawm an nei thei lo. Hun tawp dawnah Destiny Udogie-a'n mawi takin volley mah se goalkeeper Lukasz Fabianski tan hna harsa tak a ni phak lo.

Postecoglou-a naute hian palina Villa lehpel tur chuan a tlem berah goal hnih taka Hammers hi an hneh a ngai, amaherawhchu Son Heung-min leh a ṭhian ten ni dang an phak tlat lo, match hmabakah thapui an thawh a ngai dawn.

Spurs manager Postecoglou chuan, "Theih ni se la chuan computer games khelh angin, ka naute kha an awmna tur hmunah chat chat dah theih mai kha ka chak. Mahse, chu chu thil theih a ni si lo," tiin a naute khelh danah a duhthu a sam lo a, siamṭhat a tum tih a sawi tel bawk.

Moyes a lawm

West Ham hian an match hnuhnung zawkah Newcastle United chu 4-3 in an ngam lo, tunah goal an chhuah hmasa leh bawk. A tawpah erawh point khat an hmu a, a naute khelh danah David Moyes chuan a lungawi thu a sawi.

Hammers manager Moyes chuan, "A nihna tak sawi chuan a bul kan ṭan fuh loh avangin a hnufual zawk kan ni kha a mak ka ti lo. Spurs kha Champions League khelh tum an ni a, an ṭhain an hlauhawm em em bawk.

"Team ṭha tak lakah goal chhuah hmasa mah ila kan tho chhuak thei a, kar tawpa match hautak tak kan khelh hnuah tuna kan khelh leh dan hi a lawmawm viauah ka ngai, ka hmuh dan chuan point insem hi thil awm tak a ni," a ti.

Season hmasa khan West Ham hian Europa Conference League nomawi an chawi a, kuminah erawh beisei angin season an hmang ṭha lo. Moyes hi ban theih dinhmunah te a ding hman hial, tunah erawh season thara European football khel turin beisei an nei sang leh ta hle.