MBA-in inelna pasarih buatsaih dawn

Mizoram Badminton Association (MBA) Annual General Body Meeting chu April 2, Thawhlehni khan Ramhlun Indoor Stadium Conference Hall-ah neih a ni a, 2024-2025 season chhunga tournament pasarih buatsaih turin an rel.

AGM hi MBA president Dr. Lallianzuala Hnamte chuan kaihruaiin, agenda 11 lut zingah pakua chu pawm a ni a, MBA Executive Committee chuan an pawm takte hi a bawhzui dawn a ni.

MBA transfer season chu April 7, 2024 aṭanga April 30, 2024 chhung atan hawn a ni a, kum 2024-2025 chhung hian tournament lian pasarih, DBA Inter Club Tournament (District Badminton Association 13-ten an district ṭheuhah an huaihawt ang), MBA Official Championship (Senior), MBA Official Championship (Junior), MBA Junior Ranking Tournament, MBA Inter School Championship, MBA Masters Championship leh MBA Inter Club Team Championship te buatsaih turin an rel bawk.

AGM chuan Mizoram Badminton League buatsaih dan tur ngaihtuah an rel a, sponsorship hmuh dan a zira hma lak tur a ni ang. Heng bakah hian invitation tournament huaihawt turte tan inkaihhruaina tur duan a ni dawn a, Masters Championship pawh ranking tournament-a kalpui leh turin rel a ni.

MBA hian kum 2024-2025 budget atan Rs. 24,91,807/- chu an pawm bawk. Mizorama badminton thuneitu sang ber MBA hnuaiah hian District Badminton Association (DBA) 13 an in-affiliate a, DBA hrang hrang hnuaiah hian club 222 in-affiliate ve lehin, tun dinhmunah player registration tizat hi 11939 an ni. Kum 2023-24 inkar hian MBA leh DBA ten tournament vawi 40 an buatsaih hman bawk.