Mitdel tan football inelna

Indian Blind Football Federation (IBFF) hnuaia inelna - IBFF North East Zonal Blind Football Tournament 2024 chu Rajiv Gandhi Stadium, Mualpuiah khelh mek a ni a, inelna hian April 6 thleng a awh ang.

Inelna hi Mizoram Blind Sports Association thlen niin, mipa leh hmeichhe tan buatsaih a ni. Mipa inelna lamah Mizoram, Assam, Meghalaya leh Ngaland te an inel dawn a, hmeichhe lamah erawh Assam leh Mizoram chauh an tel dawn thung.

Special Blind School, Durtlang principal RK Vanlalringa chuan, "Player pariat in an khel a, vawi khatah khelmualah mi panga an lut thei a, goalkeeper chu mit var a ni thung," tiin Vanglaini a hrilh a, goal bulah hian mit var dang pakhat a awm bawk a, ani chuan goal shot hun a lo hrilh thei a, ball pass dan tur erawh a hrilh ngai lo thung.

RK Vanlalringa chuan sawi zawmin, "Player ten ball an chan khan 'voy voy voy' tiin an au thin, hei hi an thiante awmna an hriat theihna tura tih a ni. Mitdel pumhlum lo pawh visually impaired te chu an tel thei a, inkhel turte hi an mit tuamsak vek an ni," a ti.