Xavi-a'n cham a hnial lo

Season tawpa Barcelona chhuahsan tur anga sawi Xavi chuan Barcelona-a cham a hnial lo a, tun hnaia result an neih ṭhat chhoh leh tak avangin Barca thuneitute pawhin Spanish coach hi chelh an duh.

Season hmasa La Liga-a Barcelona champion puitu Xavi hian kumtir lam khan Barca a chhuahsan tur thu a sawi a, a tirah Barca thuneitu lamin an chelh lem lo. Mahse, tun hnai khan Barca president Joan Laporta chuan Xavi hi chelh an duh thu a sawi.

Laporta chuan, "Xavi-a'n thutlukna tawp a siam hma chu engmah kan ti dawn lo," a ti a, Xavi hian a ngaihdan a sawhsawn a beisei. Tun hnai khan Barca vice president Rafa Yuste pawh ṭawng chhuakin, "Xavi hi cham tura chelh ka tum dawn," a ti ve bawk.

Spanish media lamin thuthar an nei ve leh a, Xavi hian a cham dawn chuan, hun rei zawk atana club hmachhawp hriat a duh - Spanish coach hian kum hnih khat leka club hmachhawp hriat a duh lo a, hun rei zawk atan eng angin nge an inruahman a hre duh.

Xavi hian player an lakluh theih tur chin, lakluh an tum list neih a duh bawk a, hengte hi Barca board lamin an tihsak theih chuan Spanish coach hian Catalan club-a cham lawk a hnial lo.

Barcelona hi inelna hrang hrangah match 11 chhung a zawnin an tlawm lo tawh a, league table-ah pahnihna niin, Champions League quarterfinal an lut bawk - April 10, Nilaini zan dar 12:30-ah Paris St-Germain nen Champions League quarterfinal first leg an khel ang.