Magpies tan point khat

Hliam vanga player pawimawh tam tak chhawr thei lo Newcastle United chu Everton nen 1-1 in an inhnehtawk. A tir lama Alexander Isak goal khung chu inkhel tawp lamah Dominic Calvert-Lewin chuan penalty aṭangin a sut.

Magpies tana Dan Burn-a goal khung chu VAR hmanga nawl a ni a, striker Isak-a khung tur pawh goal line-ah an lo dansak. Paul Dummett-a'n Ashley Young a tih tluk avangin penalty a chawi a, goal an chhuah phah a ni.

A tirah chuan referee Tony Harrington-a'n penalty a pe lo. Mahse, VAR lamin penalty turin thurawn an pe. Magpies manager Eddie Howe chuan an penalty hmuh dan chu a nem deuh tiin a sawi a, hetih lai hian Everton manager Sean Dyche erawhin a tira an pe nghal mai lo chu mak a tih thu a sawi thung.

Newcastle manager Howe chuan, "Ka hmuh dan chuan point thum hmuh phu zawk kan ni a, hnehna chan phu khawpin kan khel ṭha. Everton kha ka dah hniam tihna erawh a ni lo a, tun ṭumah erawh kha chuan a ṭha zawk kan ni," a ti.

Premier Leaguer table-ah Newcastle hi pariatna an ni mek. Europa Conference League khel phak chin West Ham United an phak lohna chu point khat chauh a ni a, season thara European football khel turin beisei an la nei sang hle.