Chawlh zai rel lo Arsenal

Premier League nomawi inchuh boruak san vanglai a ni a, khelmual chhung leh pawn lamah inbeihna hrang hrang a leng mek - boruak sang tak karah pawh Arsenal an buai lo, an mikhual Luton Town chu 2-0 in an hneh.

Mikel Arteta naute hian point 68 neiin table hmahruaitu an ni lailawk a, nizana Liverpool leh Sheffield United inkhel result a zirin an dinhmun hi a la danglam thei. Champion lai Manchester City chuan Aston Villa 4-1 in an hneh bawk a, an inkarah point khat lek a awm.

Goal hnih a tawk

Manchester City nen match hautak an khel zo chiah a, Etihad Stadium an tlawh ṭuma hliam Bukayo Saka chu Loton Town mikhualtu Arsenal team zingah a tel thei lo - mual sirah Reiss Nelson chuan bul a ṭan.

Midfielder Jorginho aiah Thomas Partey-a'n bul a ṭan a; Hale End chhuak Emile Smith Rowe-a'n a tir aṭangin khelmual a lut bawk. Leandro Trossard leh Oleksandr Zinchenko te an lut bawk a, coach Arteta-a'n player a siksawi nual.

Mual laiah Smith Rowe a hmuhnawm, English attacking midfielder hian Pelly Ruddock Mpanzu-a ball chan a chhuhsak chu Martin Odegaard-a'n Kai Havertz tan a pe a, Germany international Havertz hi Luton defender ten an bawr karah Odegaard tan a siamsak daih.

Arsenal captain Odegaard hian minute 24-naah goal hmahruai a khung, chawlhlawk hmain Gunners goal hnihna kan hmu leh bawk. Box chhungah Smith Rowe-a'n duh tawkin ball a chetpui a, a cross chu Daiki Hashioka-a'n anmahni lamah a ti lut.

Japan defender Daiki Hashioka khan anmahni lamah ti lut lo pawh ni se a hnunga awm Reiss Nelson khan a khung dawn tho, goal hnihna an neih chhan leh a sual chhuaktu chu Smith Rowe a ni a, match pum thlir pawha khel ṭha ber a ni bawk.

Arsenal an puitling

Tun kar tawpah Arsenal hian Brighton an tlawh leh nghal dawn, coach Arteta-a'n match hautak an ngah chho dawn tih a hria, a midfielder pawimawh Declan Rice pawh hahchawlhna hun a pe, an indahṭha nual chungin Luton lakah harsatna an tawk lo.

Season dangah chuan Arsenal hi season chawhnu lam, champion tuma inum boruakah an zuih nasa ṭhin hle. Kum 2024 chinah erawh an khel ṭha tual tual, kuminah hian league match bikah an la tlawm miah lo, boruak sang an ngam rih ta hle.

Gunners manager Arteta chuan, "Tlarhnung phui hi kan chakna lungphum pawimawh a ni, tun hnai league match hnuhunung pasarih aṭangin pangaah goal kan chhuah lo. A hnung lam a phui miau chuan midang pawhin inrintawkna an neih phah nasa.

"Brighton kan tlawh hmain hahchawlhna hun rei lote kan nei dawn, anni hi team ṭha leh hlauhawm tak an ni tih kan hria, chuvangin ruahmanna pawh fel leh fimkhur taka kan neih a ngai ang," tiin a sawi a, a player hliam tenau neite an dam a beisei thu a sawi bawk.

North London club hian Premier League bakah Champions League quarterfinal an khel chhunzawm dawn, German champion Bayern Munich nen an intawn dawn avangin an tan fiahna hautak a inṭan chho dawn tiin a sawi theih.