Aizawl FC hmachhawn tur Churchill Brothers

I League-ah Aizawl FC-in zanin dar 7:00 hian Tilak Maidan, Goa-ah Churchill Brothers an hmachhawn dawn. Mizo club hian RG Stadium-ah Goan club hi 4-0 ngawtin an sawp a, khualmuala inkhel tur ni mah se an inkhelh tawhnaa an result hian inrintawkna nasa tak a pe ngei ang.

Mizo club hian match hnuhnung berah Namdhari nen 1-1 in an inhnehtawk a, damlohna avangin defender Ivan Maric a inlan thei lo. Churchill lakah Serbian defender Ivan hi inlan thei tawh tura ngaih a ni. Match hnuhnung berah hian Mizo 10 ngawtin inkhel bul an ṭan a, Churchill lakah an intawn hmasak ṭum angin Mizo pakuain bul a ṭan a rinawm.

Churchill laka goal hnih khungtu Lalrinzuala'n goal a la khung belh leh lo a, tun inelnaah match 19 aṭangin goal 15 khungin Gokulam Kerala FC striker Alejandro Sanchez chauh a tluk lo. Serchhip tlangval Rinzuala tan Indian zinga goal khung tam ber ni ringawt lo a, inelna pumpuia top scorer ni turin Churchill laka goal khung belh a pawimawh ang.