Manchester City chakna Phil Foden

Pep Guardiola-a'n bench lamah Erling Haaland leh Kevin de Bruyne te dah daih mah se Manchester City tan buaina tur a awm lo. Phil Foden-a hattrick hmangin Citizens hian an mikhual Aston Villa chu 4-1 in an sawp.

Arsenal laka goal an khung theih lohna Etihad Stadium-ah Man City hian mikhual an thleng nawn a, tun ṭuma an mikhual Unai Emery naute hi goal nawr chi an nih avangin ṭum li ngawt an paltlang hi a mak hran lo.

Rodri chuan bul ṭanin Jeremy Doku-a siamsak chu goal kilah a chhuih lut - Villa lamin City tlarhnung mawi taka ṭhiatin Jhon Duran chuan keeper Stefan Ortega dan hman lohin a khung a, si phurh a sut ve leh hmak.

Julian Alvarez-a'n remchang a hmuh vawi hnih a khung lo a, chawlhlawk hma hretin Foden a inlar. England international hian a freekick hlawhchhuah chu an goal hnih nan a chhuih lut.

Kum 23 mi Foden hian Rodri siamsak hmangin an goal thumna a khung - Spanish midfielder in box chhung vel chiaha a ball lirh luh chu Foden hian laklawh nei miah loin a khung a, a hnuah a ball hloh tawh chu vannei taka la letin box pawn aṭangin goal kilah a tlawh lut bawk.

Foden hian EPL bikah hattrick vawi thum a siam tling ta chiah, player ropui Frank Lampard, Cristiano Ronaldo leh Didier Drogba te nen hattrick an siam zat a inang ta reng, a la naupan avangin hmabak êng tak a la nei bawk.

Man City manager Guardiola chuan, "Phil hi chuan goal khung theihna hi a pianpui a, tun ṭumah khan a rawn hmang leh ta chiah. A tirah khan bul ṭan ṭha tawk lo mah se a insiamṭhat chhoh dan kha a pui hle, mual laia a chet tlat hian a hlauhawm zual.

"Player theihna sang bik a ni a, a nihna takah chuan khelmual chhungah hian a duh ang thil a ti thei ni maiah ka ngai. Chutihrualin inkhel kalhmang a thlir thiam a la ngai ve bawk," tiin hmasawn a ngaihna lai a sawi.

Man City hian Inrinni zanah Premier League khel turin Crystal Palace an lenchilh dawn - Real Madrid nen Champions League quarterfinal khelh hmabak an la nei bawk a, player insiksawi chhoh a ngai nasa dawn tih a chiang.