German Cup-ah Leverkusen-in final an lut

DFB Pokal semifinal-ah Bayer Leverkusen chuan 2. Bundesliga club Dusseldorf chu April 3, Nilaini zan khan 4-0 in an sawp a, final an lut. Xabi Alonso hote hian Saarbrucken hnehtu FC Kaiserslautern nen May 25, Inrinniah nomawi an inchuh ang.

Leverkusen hian season ṭha bik an hmang mek a, tun season-ah match 40 khel tawhin chak loh an la tawng lo. BayArena-a inkhelah hian Leverkusen tan Jeremie Frimpong leh Amine Adli ten goal khat ve ve an khung hnuah Florian Wirtz-a'n goal hnih a khung.

Bayer an ṭha

Bayer Leverkusen-in an mualah semifinal an khel a, team ṭha zawk an nihna lantir turin hun an mamawh rei lo. Ṭan phat aṭangin Leverkusen an hlauhawm nghal a, minute sarih chhungin vawi thum goal khungna chance an nei a, Frimpong hmangin an khung.

Xabi Alonso hote hian ball an inpe kual ṭha a, inrintawkna an ngah a tih a chiang. Minute 90 chhungin vawi 832 zet an inpe kual thei a, Dusseldorf erawhin vawi 328 chiah an in pass.

Goal hnihna hi minute 20-naah a lut a, Leverkusen hian tlarhnung aṭangin ball an in pass chhuak a, a bu ang thlap a ni. Florian Wirtz-a'n rang takin ball a khalh chhuak thut a, vei lamah amah pawttu Amine Adli chu pein Adli hian tawi te a khalh hnuah box chhung aṭang chiahin goal kilah a pet lut.

Dusseldorf-in tlarhnung aṭanga passing hmanga ball lakchhuah an tum a, goalkeeper pass sual chu Robert Andrich zawnah kalin Germany international midfielder hian vawi khatah Adli a pe nghal a, ani pawh hian vawi khatah tho Wirtz a pe. Leverkusen hian chiang takin Dusseldorf tlarhnung an ṭhiat a, minute 35-naah Wirtz hian defender pakhat bumin ṭha zetin a pet goal.

Mikhual team hian chance nei ve bawk mah se Leverkusen goalkeeper Matej Kovar an paltlang thei lo. Kovar hian ṭum hnih ṭha zetin a dang. Inkhela chungnung zawk erawh Leverkusen an la ni reng a, Patrick Schick-a'n ball tauhin goal ban a per. Mahse, VAR hmanga enlet hnuah ball hian goal ban a per hmain Dusseldorf defender Matthias Zimmermann kut a fuh.

Penalty hmuh pet turin Wirtz a rawn pen chhuak a, minute 60-naah Leverkusen goal lina a khung. Goalkeeper Florian Kastenmeier dive dik mah se Wirtz-a ball pet hi a kil em avangin a dang thei lo.

Leverkusen hian goal li an khung hnuah pawh an nawr chhunzawm a, goal dang a luh belh lo thung. German Cup-ah Leverkusen hian kum 1993 khan nomawi an chawi a, 31 hnuah nomawi chawi thei dinhmun an ding.

A ropui e

Bayer Leverkusen thlen chin hi a ropui hle. Match 40 chhung hneh loh an tawng tawh loh avangin Bundesliga-ah nomawi chawi turin an dinhmun a ṭha a, German league sang bera nomawi an la chawi loh avangin Neverkusen hming lem an pek pawh nuai rehin a awm thei ṭep.

Leverkusen tan Bundesliga nomawi a hnai a, DFB Pokal final-ah pawh 2. Bundesliga club FC Kaiserslautern an hmachhawn dawn avangin champion ngei tura ngaih an ni.

Europa League-ah Leverkusen hian quarterfinal an thleng bawk a, West Ham an hmachhawn dawn. European competition-a an champion bawk a nih chuan Alonso hote hian tun season-ah nomawi lian tham pathum an chawi thei dawn tihna a ni.