Gunners an chuai; record thar nen Reds

Arsenal-in Premier League-a pathumna dinhmun luah tura Manchester City lehpelhna hun ṭha an neih an chhawr ṭangkai thei lo a, Pathianni zan khan an mikhual Crystal Palace chu 1-1 in an inhnehtawkpui.

Gunners-in Alexis Sanchez hmanga hma an hruai hnuah inkhel thunun mah se goal hmaa an hlauhawm tawk loh an tuar a, mikhual team tan Yannick Bo-lasie-a'n an si phurh a sut avang-in point khatah an lungawi a ṭul.

Champions League a chiang em?

January velah Arsenal-in champion an sawi ri a, season tawp a hnaih meuh chuan Champions League an khelh dawn leh dawn loh pawh a chiang ta lo.

Gunners hian an khelmuala match an khelh hnuhnung paruk aṭangin point riat chiah an hlawh chhuak thei a, pathumna City nen point hmuh zat inangin an hnuai chiaha awm Manchester United aia an sanna chu point li chiah a ni tawh.

Arsene Wenger-a'n Arsenal kum 20 a enkawl chhungin Champions League a khelhpui lo ngai lo a, mah se a season hnuhnung 10 lamah pathumna aia sang dinhmunah Gunners a la hruai thlen loh avangin sawisel a hlawh hle - kuminah Champions League an khel lo a nih ngat chuan Emirates Stadium-ah French manager hi kan hmuh chhunzawm lo a nih pawhin a mak lo ang.

Wenger thukhawchang

Arsenal manager Wenger chuan, "Ball tam tak chang chung siin kan chhawr ṭangkai thei lo a, hmun awl kan insiam loh bakah kan hriam tawk lo. Chhiarkawp danin eng dinhmunah nge kan din ka hrethiam lo a, ka rilrua awm erawh Champions League a ni. Europe-a club inelna sang ber khel tur hian theihtawp kan chhuah chhunzawm zel ang," tiin an la beidawn loh thu a sawi.

Reds an vul zel

Europa League-a inlehthal-na ropui an lantir hnu lawkah Liverpool-in hnehna an chang lehnghal a, Pathianni zan khan an mikhualna ramah Bour-nemouth chu 2-1 in an hneh.

Reds tan Roberto Firmino leh Daniel Sturridge ten goal khat ve ve an khung a, mual-neitu team tan injury time-a Jo-shua King-a goal khat khungin awmzia a nei thui lo.

Liverpool-in Premier Lea-gue-ah club 50 khelmualah hnehna an chang ta a, Premier Lea-gue club zingah club 50 khel-muala chak thei hmasa ber an ni.

Reds-in Premier League hmanga Champions League khelh beisei mah se Europa League champion chu kalkawng awlsam zawk niin a lang. Reds hian khelh khata khel tlem zawk nichungin palina Arsenal chu point kuain an la phak lo.

Klopp-a thukhawchang

Liverpool manager Jurgen Klopp-a'n Borussia Dortmund laka inkhel chau a player tam zawk a chawlh hahdamtir a, khualmualah player naupang rual hruaiin hnehna a chang.

German manager chuan, "Ka player-te kha la khel ho ngai miah lo an ni a, kha aia tlarhnung kha phui zawk tur a ni. First half-ah pawh kha aia ṭha zawka khel thei turah ka inngai a, mah se kan khelh dan pumpui thlir chuan a lawm-awm takzet a ni," tiin a naute khelh danah a lawm thu a sawi.