Delhi tan Quinton de Kock a langsar

Pathianni khan Indian Premier League-ah match hnih khelh a ni a, Kings XI Punjab chuan match hnih chhung chak hmel an hmuh loh hnuah Rising Pune Supergiants chu wicket rukin an hneh a, inkhel hnuhnung zawkah Delhi Daredevils chuan Quinton de Kock-a century chhawr ṭangkaiin wicket sarihin Royal Challengers Bangalore an hneh bawk.

Pune khawpuia inkhelah mualneitu an bat hmasa zawk a, over 20-ah run 152 siamin mi pasarih an hloh. Pune tana run siam hnem ber Faf du Plessis chuan run 67 vaw chhuakin captain MS Dhoni chuan run khat chauh a siam tihin a out.

Punjab-in over 18.4 lekah run 153 siama mi pali chiah hlohin an target an umpha a, run 53 siamtu Murali Vijay leh run 51 siamtu Manan Vohra-te'n mikhual team chakna kawng-ah an thawhhlawk hle.

Inkhel hnuhnung zawkah over 20-a run 191 siama mi panga chiah hloh Royal Challengers Bangalore-in khel
ṭha viau mah se Delhi Daredevils-in over 19.1-a run 192 siama mi pathum chiah hlohin an target an umpha a, beisei loh zawk mikhual team an chak.

Bangalore tan run 79 siamtu Virat Kohli leh run 55 siamtu AB de Villiers-te khel ṭha viau mah se Delhi-in run 108 zet vaw chhuaktu Quinton de Kock leh run 54 siamtu Karun Nair an neih ve tho avangin mikhual team hi chak zawkah an ṭang ta a ni.

Zaninah inkhel pakhat a awm dawn a, dar 8:00-ah Kings XI Punjab chuan Kolkata Knight Riders an mikhual ang.