Messi goal 500-na Barca tan a tawk zo lo

Lionel Messi-a'n a career-a a goal 500-na a khung zanah Barcelona a chakpui zo lo a, Valencia lakah Catalan club hi 2-1 a an tlawm avangin La Liga champion nomawi inum boruak a nung thar hle.

Nou Camp-a inkhelah beisei loh zawk Valencia-in goal an khung hmasa. Guilherme Siquei-ra-a shot chu Ivan Rakitic-a'n an lamah a ti lut a, chawlhlawk hma lawkin Santi Mina chuan Valencia hmahruaina a belhchhah bawk - Nou Camp thawm a dai.

Second half-ah Lionel Messi-a'n Barca beiseina chhi nung turin goal khung mah se Copa del Rey-a 7-0 a an sawp hnu club lakah Barcelona an thamral a, La Liga nomawi chawi thei dinhmunah club pathum an awm leh ta.

Barca an chuai

April thla tir khan La Liga-ah Barcelona in point kuain hma an hruai fal a, Catalan club hi league nomawi chawi chiang deuhthawah ngaih an ni.

Mahse, Barcelona-in El Clasico-a Real Madrid an hneh loh hnuin ngai an awh leh tawh lo a, Champions League aṭangin Atletico Madrid-in an hnawt chhuak a, Valencia laka an tlawm hma hian Real Sociedad lakah 1-0 in an lo tlawm tawh bawk.

Kartawp inkhelah Atletico Madrid leh Real Madrid-in an khingpui an hneh ve ve bawk si avangin La Liga nomawi chawi thei club pathum an awm leh tawh. Barca hi Atletico aiin Head to head-ah an chungnun zawk avang chauhin league table-ah pakhatna dinhmun an luah a, pathumna dinhmun luahtu Real chu point khat chauhin an hnufual bawk.

Hmasawn Valencia

Gary Neville-a'n Valencia a enkawl laiin Barcelona chu hneh theih loh thawthang an nih thu a sawi a, February thlaa Copa del Rey semifinal-ah Catalan club hian 7-1 in an hnawt chhuak.

Mahse, Valencia-in Neville an ban aṭanga thla tam pawh a liam hmain Nou Camp-ah hnehna an chang a, relegate hial sawi hman team kha Liverpool assistant manager hlui Pako Ayestaran kaihhruiana hnuaiah 12-na dinhmun an hauh ta.

Enrique a beidawng lo

Barcelona coach Luis Enri-que chuan, "Chak takin kan awm tur a ni a, kan hmabak match ngaah kan chak vek tur a ni, chu chu kan ti thei tih pawh ka hria," tiin league nomawi chawi ngei an tum thu a sawi.

Torres a lo kir e!

Barcelona chak loh zanah Atletico Madrid-in Granada chu awlsam takin 3-0 in an hneh a, Fernando Torres chuan match li chhung a zawna goal a khungna ni turin Atletico goal hnihna a khung - Torres kan hriat ṭhin kha a lo kir leh ta!

Atletico tan Koke chuan goal hmahruai a khung a, Torres-a'n goal a khung hnuah an chak nemngheh nan substitute Angel Correa chuan goal khat dang a khung ve leh bawk.

Liverpool striker hlui Torres-a'n Atletico tana a inlan hnuhnung match 12-ah goal sarih a khung tawh a, Euro 2016 squad atan en kan a harsa tawh hle ang.

Atletico-in tun season league match-ah goal 16 chiah an la chhuah a, season khat chhung goal chhuah tlem ber Deportivo La Coruna chuan kum 1993-94 season khan goal 18 chiah an chhuah.