Beidawng duh lo Dortmund kal zel

Borussia Dortmund chuan Bayern Munich lakah Bundesliga nomawi an thlah mai phal bik rih lo a, Pathianni zan khan Hamburg 3-0 a sawpin an inthlauhna chu point sarihah an ti zim leh rih.

Dortmund tan hian Christian Pulisic-a'n minute 38-naah goal hmahruai a khung. American rawlthar Pulisic hi kum 17 leh ni 212 chauha upa la niin Bundesliga chanchina goal khung thei naupang ber palina a ni.

Colombian striker Adrian Ramos chuan chawlhlawk hma hretin an goal hnihna a khung a, Hamburg keeper Rene Adler chu Shinji Kagawa a tih tluk vangin minute 52-naah hnawhchhuah niin Ramos chuan an goal thumna a khung zui leh bawk.

Thomas Tuchel-a naute hi sea-son thara Champions League khel tur chuan an tling chiang tawh a, mahse league match li chiah khelh hmabak a awm tawh avangin Ba-yern-in a zawna Bundesliga title vawi li an chawi tur chu an dang thei dawn tawh lo niin a lang.

Season thara Manchester City manager ni tawh tur Pep Guardiola enkawl Bayern hian Inrinni zan khan Schalke 3-0 in an sawp a, kartawpa Hertha Berlin an hneh a, Dortmund-in Stuttgart an lo hneh lo thung a nih chuan league-ah an champion thei tawh dawn a ni.

Dortmund hi Europa League quarterfinal-a Liverpool laka 5-4 a chak lo hlim an ni a, an insiamṭha thei nghal chu lawmawm a tih thu sawiin Tuchel chuan, "Kan rilruah Liverpool kan hneh loh kha a awm tawh lo ang maiin kan khel chhuak nghal thei a, Hamburg tlarhnung kha khawng hle mah se goal thum ngawt kan thun theih avangin kan khelṭha tih a chiang," tiin a sawi.