German Cup lâk duhtu Lewandowski

Zanin zanlai dar 12:00 hian DFB-Pokal semifinal khelh a ni dawn a, Bayern Munich leh Werder Bremen an inhmachhawn ang. Striker Robert Lewandowski chuan nikuma an chet fuh loh tawh naah hian nomawi chawi ngei a duh tawh thu a sawi.

Pep Guardiola naute hian season hmasa khan semifinal-ah Borussia Dortmund an ngam loh avangin DFB-Pokal nomawi an chawi lo a, kuminah erawh season tawp ruala chuak tur Spanish manager hian nomawi nena a hun hnuhnung hman a duh ngei ang.

Poland international Lewan-dow-ski hi Champions League quar-^-ter-final-a Benfica an hneh ṭumin bench-ah ṭhut tir a ni a, kar-tawpa Bundesliga inkhelah erawh bul ṭantu zingah tel leh tawhin goal hnih a khung.

Tun season-a a club tan inelna hrang hranga match 44 a khelh tawh aṭanga goal 38 khungtu Lewandowski chuan, "Nikum khan DFB-Pokal semifinal-ah Dortmund kan hneh lo a, kuminah erawh Berlin-ah final khelh a nomawi chawi ngei kan duh avangin Bremen kan hneh hmasak a ṭul," tiin a sawi.

Benfica laka inkhel bul a ṭan loh chungchang sawi telin,"Inkhelh apiangin a bul ṭantu nih ziah ka duh a, bench-a ṭhut hi chu engtik lai mahin a lawmawm ngai lo. Mahse, inkhelh tur kan ngah avangin 100%-a ṭhaa khelh reng a har a, a chang chuan chawlh kan mamawh ve ṭhin," tiin a sawi.

DFB-Pokal semifinal pakhat zawk hi Nilaini zan hian khelh a ni ve thung dawn a, Hertha BSC leh Dortmund an inhmachhawn thung dawn a ni.