Nomawi chawitu Nadal a lawm

Pathianni zan Monte Carlo Masters final khelh-ah Rafael Nadal chuan 7-5, 5-7, 6-0 a Gael Monfils hneh-in kumina a vawi khat nan champion nomawi a chawi.

Kum 29-a upa Nadal hi hliamin a tih buai fo avang leh Novak Djo-kovic-a'n vanglai a hman mek avangin nomawi chawi a harsat rih hle a, nikum khan vawi thum chiah champion nomawi a chawi nghe nghe.

Tunhnai kum 13 chhunga clay court-a la champion ziah Nadal chuan, "Ka tan chuan kar pawimawh bik a ni a, hei hian nikum aiin hma ka sawn tih a lantir, ka hlim takzet a ni" tiin a sawi.

Grand Slam vawi 14 champion tawh Nadal chuan inbuatsaihna a neih ṭhat thu sawi chhun-zawmin, "Nikumah khan hun harsa ka tawk a, hliam ka neih fo bakah ka dam lai pawhin ka khel-
-ṭha lo ṭhin hle. Kuminah erawh duhthusamin la khel chhuak lo mah ila inbuat-saihna ka neih ṭhat avangin ka hlawhtling leh ta a ni," a ti.

World number 5 Nadal hian ATP World Tour Masters 1000 title 28 a la tawh a, Djokovic nen an intluk rih a, an hnuaiah hian Roger Federer (24) leh Andre Agassi (17) te an awm bawk.

Spanish star Nadal hi clay-ah a inkhel thiam bik a, tennis a khelh chhungin nomawi 68 chawi tawhin a hlawhtlin zualna tur chu Monte-Carlo (9), Roland Garros (9), Barcelona (8), Rome (7) te an ni.