Juventus-in Serie A champion hnaih zel

Pathianni zan khan Juventus chuan an mikhual Palermo chu 4-0 in an sawp a, a zawna a vawi nga nana Serie A title chawi turin vawi thum chak bak an mamawh tawh lo.

Turin-a inkhelah Germany mid-fielder Sami Khedira chuan Paul Pogba hnen aṭanga a ball hmuh chu a awma lo dawngin minute 10-na lekah yard 15 a hla aṭangin a pet goal nghal. Goal khatna siam-saktu French midfielder Pogba hian second half-ah an goal hnihna a khung a, Juan Cuadrado leh Simone Padoin te pawhin goal khat ve ve an thawh ve bawk.

Juve hian point 79 hmuin league hmahruaitu an nih chhunzawm zel a, pahnihna Napoli aiin point kua ngawtin an sang fal tawh a, inkhelh hmabak panga an la nei.

Juventus head coach Massimi-liano Allegri chuan, "Minute 10-na lekah goal kan khung avangin inkhelh a awlsam phah. Mahse, kan hun ṭha neih kan chhawr ṭangkai tawk lo a, tih fuh loh tam tak kan nei. Pogba khan a khel ṭha hle a, goal nawr tur leh venghim tur khan a thawhhlawk hle a ni. Mahse ani pawh hi tihsual nei lo tawp chu a ni bik lo. A pumpui thlir chuan final khel ang maiin kan ṭang a, kan khel ṭha thawhkhat hle," tiin a sawi.

Inkhel dangah Francesco Totti chu bench aṭanga rawn tlat lutin goal a rawn khung a, Roma leh Atalanta te chu 3-3 in an inhnehtawk.

Roma hian France left-back Lucas Digne leh Belgium midfielder Radja Nainggolan te goal khung hmangin 2-0 in hma hruai mah se Marco D'Alessandro leh Marco Borriello goal hnih hmangin Atalanta lamin an chhang let. Kum 39-a upa Totti chuan hun tawp hma minute nga chauh awm tawh tihah an si phurh sutna goal a khung a ni.

Roma fapa rangkachak Totti hian Serie A-ah goal 245 a khung tawh a, kum 1954-a Lazio leh Novara striker hlui Silvio Piola record lo siam tawh Italian Serie A-a goal khung hnem ber nihna chu goal 29 in a la phak lo.

Tun season Serie A match 33 khelh tawh aṭangin Roma hian point 65 hmuin league table-ah pathumna dinhmun an luah a, season thara Champions League khel turin an him rih. Amaherawhchu, an hnuai chiaha awm Inter Milan nen an inthlauhna chu point li chiah a nih tawh avangin ngaihṭha taka awm thei erawh an la ni bik lo thung.