Chanmari FC-in Sanga an la let

Mizoram Premier League Season 5 boruak a sang dawn, a bul ṭan nan Chanmari FC-in an elpui Bethlehem Vengthlang duhlai Lalsangzuala Hmar chu season thara an club enkawl turin an la lut.

Chanmari FC-in MPL1 Qualifier an khelh dawn khan coach atan Sanga an la lut a, amaherawhchu CFC hian Red Ribbon Football-a Chanmari Veng champion puitu Lalchhuanawma Pautu (Lcha) chu coach atan an lakluh zui avangin assistant coach hna a chelh. Chanmari FC-in H. Vanlalthlanga enkawlna hnuaia MFA Cup, I Day Football leh Mizoram Premier League-a an champion khan Sanga hian assistant coach hna a chelh char char bawk.

Bethlehem Veng-thlang FC-in Sanga
ṭhatna hmu fuhin NECS Cup 2015 inelnaa an veng enkawl turin an sawm a, BVT FC coach atan an ruat zui bawk. Coach ze zawi tak Sanga hian BVT FC hi season khat chauh enkawl mah se I Day Football final a thlen pui bakah MFA Super Cup-ah a champion pui a, MPL4-ah semifinal a thlenpui bawk. Sanga hian veng leh veng inlenaa champion ngai lo Bethlehem Vengthlang chu NECS Cup 2016-ah a champion pui a, kum khat chhung lekin sulhnu a nei ṭha hle.

Chanmari FC hian MPL2 an champion hnuah final ṭum hnih lut leh tawh mah se Aizawl FC lakah an tlawm ve ve a, season tharah I League club chunga awm ngei tumin hma an la chho mek.