Zaninah MSL2 Finals Game 2 Tuikual South dang turin Pratham
Zanin hi Mizoram Super League Season 2 hmawr bawk zan a nih theih tawh avangin Hawla Indoor Stadium chhung chang tur chuan kal hma ngei a ṭul ang.
Tuikual South-in champion nomawi chawi turin vawi khat chak bak an mamawh tawh lo a, amah-erawhchu Khatla TBL-in an champion nomawi kawl lai hi pek mai an tum lo.
Champion lai hian MSL1 final-a player pawimawh Pratham Singh chu zanina chhawr theih turin an chah a, India captain Vishesh Bhriguvanshi a rawn inlan hman pawhin thilmak a ni lo ang.
MSL2 finals game 2 hi zanin dar 8:00-ah khelh ṭan a ni ang a, Zonet Zawlbuk-ah pekchhuah a ni dawn.
Danglamna Rakesh
Game 1-ah Tuikual South chakna chu Rakesh a ni a, chutihrualin Khatla TBL laka Phengphehlep falna tam lohna chhan pawh Haryana forward vang tho a ni. Hun pawimawhah Rakesh a che ṭha ngei a, amaherawhchu TKS chakpuitu state pawn player hi inkhelh ṭantirh lamah team tichhetu a ni.
Game 2 a thlen meuh chuan Rakesh-a'n hahdamna hun a nei tawh dawn a, coach KC Lalliantluanga ṭang-kai zawkin a hmang thei tawh ang. Phengphehlep tan Rakesh hi pawimawh bawk mah se final an thlenna kawngah erawh anni aia team anga thawkho ṭha an awm lo.
Tuikual South tan captain F. Zodinthara chu team kaihruaitu pawimawh a la ni reng a, damlohna vanga Mission Veng Vikings an hneh ṭuma inlan lo Vanchuangpuia'n final game hmasa berah team innghahna a ni tih a rawn lantir bawk. TKS tan hian season ṭan hmaa an lakluh K. Vanlalruata leh Mapuia Zote te an pawimawh chho zel a, Khatla TBL-in state pawn player an chhawr a nih chuan MSL1-a point ngah ber Mapuia Zote a pawimawh lehzual ang.
Pratham telin
Khatla TBL-in MSL1 final-ah Zarkawt BCA 67-61 a hnehin an cham-pion a, hemi ṭum hian Uttar Pradesh forward Pratham Singh chuan vawi 14 freethrow-ah vawi khat chiah a hlah. TBL hian MSL2 final game hmasa berah freethrow vawi 33-ah vawi 10 chiah an luh laiin TKS-in vawi 35-ah vawi 21 an lut thung a, champion lai chak loh chhan hi freethrow-ah a ngaih theih. India tan pawha player pawimawh ni pha Pratham chuan danglamna a thlen ngei ang.
Pratham aia player ṭha zawk chu Vishesh Bhriguvanshi a ni a, player ṭha pahnih tel hian Khatla TBL-in League match hnuhnung berah Tuikual South hi 94-70 in an sawp. Hemi ṭum hian India captain Bhriguvanshi chuan, "Player sang an kawl loh vangin min elpha lo a, engtiklai mahin kan buai lo," tiin inkhelh banah a sawi. India captain hi a inlan thei dawn em tih a la chiang lo a, tel ta reng pawh nise Tuikual South-in player sang Rakesh an nei tawh.
India player tel loin
Khatla TBL hotuten India player hi an be fel a nih pawhin khaw awm dan a zirin an ruahman loh dan ang a kal thei bawk. Pratham leh Bhriguvanshi te an awm loh chuan TBL-in MVP nilai H. Laldinsanga an chhawr theih tawh loh bawk avangin guard lamah harsatna an tawk ngei ang.
Game 1-ah Khatla tana khel ṭha ber Vanlalmuana'n chhawr rim a dawl lo a, inhliam vanga a chhuah hnuah TBL an buai. Dawrpui Vengthar tlangval Muana hian a veng pui Lalrinzuala bakah captain Vanlalnunsanga, Jacob Laldinliana leh Lalrinpuia Hlondo te
aṭangin thlawpna ṭha a mamawh.
Defence lam erawh Nelson Lalrohlua an nei let tawh a, Gospel Lalthawmmawia leh Eddie Zaithanmawia te an awm bawk avangin ngaituahawm an ni lo.
Mapuia Vs KC-a
MSL2 Final hi coach ṭha pahnih inbeihna a ni dawn a, defensive game khel thiam ve ve an nih bakah offence-ah an ṭha tel bawk.
MSSC aṭanga Tuikual South-in an hawh coach KC Lalliantluanga chuan, "Kan dam kim a, player 12 thlan pawh hi a hautak tham khawp mai. Rakesh hi game 1 aiin a ṭha tawh zawk dawn a, game 3 thlen kan duh lo," tiin chak ngei an tum thu a sawi.
TBL-in Nelson-a an lakluh dan chungchang sawi zuiin Tuikual South boss chuan, "MSL2 ṭan hma khan MBBA chuan damlohna/inhliam vanga player inhliam an awm a nih chuan squad hi tih danglam theih tih thutlukna a siam. Khatla TBL hian MBBA dan ang thlapin Nelson-a an la lut a, dan an bawhchhe lo," tiin Vanglaini palai a hrilh.
KC-a hian Khatla TBL-in state pawn player an chah thleng a nih pawhin an inzir lawk thu Vanglaini palai a hrilh bawk.
SYS aṭanga Khatla TBL-in an hawh coach Mapuia chuan, "Chak ngei kan tum a, chumi tur chuan kan practice bawk. Kan chakna chance hi a tam zawkah ka ngai," tiin a inringtawk hle.