Sir Alex dah sangtu Chicharito

Manchester United-a Sir Alex Ferguson-a enkawlna hnuaia hlawh-tling taka lo khel tawh Javier Hernandez chuan Red Devils tan Sir Alex-a thlak zotu tur chu kum 100 hnuah pawh zawn hmuh theih a rin loh thu a sawi.

Louis Van Gaal-a enkawlna hnuaia beisei phak lo tak Manchester United hian kum 2013-a Sir Alex-a'n a chawlhsan hnuah Scottish manager thlak zotu an la hmu lo a, tunah hian Chelsea boss hlui Jose Mourinho nen sawi zawm mek an ni.

United tan vawi 157 a inlana goal 59 khungtu striker chuan, "Sir Alex Ferguson hi manager
ṭha tak a ni a, amah thlak zo tur hi chu tun aṭanga kum 50 emaw kum 100-ah pawh kan hmu lo ang. Mi danglam a ni a, ani kha chu mi bik a ni," tiin khawvel hriata amah pho chhuaktu manager chu a fak.

Old Trafford a chhuah-san hnuah Mexican striker hian Bayer Leverkusen tan vawi 37 inlanah goal 25 a khung tawh a, United striker hlui chuan, "Van Gaal khan tlang takin khelhna hun ka chan tlem tur thu min hrilh a, a tir
aṭanga tlang taka thu min hrilh avang khan ka lawm hle a ni," tiin United a chhuahsan chu ti fuh a inti hle.