Kawnpui leh Kanan an tlang

Nimin khan All Mizoram U16 Inter LC/VC Football Tournament 2016 chu Lammualah quarterfinal khelh ṭan a ni a, Kawnpui VC III chuan Zemabawk 2-0 in an hneh a; inkhel hnuhnung zawkah Kanan chuan Kawrtethawveng lakah 2-1 in hnehna an chang hram bawk.

Inkhel hmasa zawkah Aizawl khawpui pawn team ṭha Kawnpui VC III tan Lalhming-sanga chuan minute 15-na lekah goal hmahruai a khung a, Zemabawk hian sût theihna hun ṭha an neih ṭum thum vel an hmuh an chhawr ṭangkai lo a, an tuar. Hun tawp dawnah Kawnpui tan Lalhmingmawia'n an chak nemngheh nan goal an khung leh ta a ni.

Passing game mawi tak khel ṭhin Kawnpui hian last 16-ah College Veng chu 6-0 in an sawp a, round hmasa lamah Bethlehem Vengthang, Armed Veng leh Hlimen te an lo hneh tawh bawk.

Inkhel hnuhung zawkah Kanan-in minute lina lekah Vanlalhruaizela hmangin goal hmahruai an khung a, Kawrte-thawveng hian Lalremliana hmangin minute 27-naah an chhang let.

Second half-ah team pahnih an innawr tawn a, Kanan lamin counter attack hmang ṭangkaiin goal hmahruai khungtu Hruaizela chuan minute 54-naah a team hma a hruai nawn pui.

Talent nei ṭha Kawrte lamin an si phurh sut ngei tumin thapui an thawh a, ball chang tam zawkah
ṭangin goal chance pawh hmu nual mah se an chhawr ṭangkai zo lo.

Kawrtethawveng lamin rawl-thar ṭha tak tak an nei tih an pholang tawh - last 16-a Dinthar 4-1 a an sawp ṭuma goal li khung thei Lalchhanchhuaha khelhna team hian last 16-a Republic Veng 2-0 a hnehtu Kanan tlarhnung an sut hawn zawh tak loh avangin semifinal an lut zo ta lo a ni.

Kanan fighting spirit a fakawm a, huaisen taka an ṭan tlat avangin quarter final an thleng ta.

Quarter final kharna

Vawiin hian quarterfinal khelh zawh a ni dawn a, chhun dar 12:00-ah Salem leh Tuikual North te an inhmachhawn ang a, chawhnu lamah Tanhril leh Tlungvel an inkhel bawk dawn. Semifinal hi tunkar Ningani hian khelh tur a ni.

MFA buatsaih kum 16 hnuai lam veng leh veng inelna hi March 19 aṭang khan Lammual leh RG Stadium, Mualpuiah khelh ṭan ni a; team 107 inziak lut zingah team 10 te chu kum bithliah chung lam an khelh tih fianfiah a nih avangin disqualify an ni.

Nimin Inkhel Results

Quarterfinal

Kawnpui VC III 2 - 0 Zemabawk

KAW:Lalhmingsanga15'; Lalhmingmawia 82'

Kawrtethawveng 1 - 2 Kanan

KAW: Lalremliana 27'

KAN: Vanlalhruaizela 4'; 54'

Vawiin Inkhel Tur

12:00 Noon Salem Vs Tuikual N

02:00 PM Tanhril Vs Tlungvel