Italy 'World Cup' hero Rossi a thi

Footballer ropui Paolo Rossi chu December 9, 2020 khan Rome-ah kum 64 mi niin a thi. World Cup 1982-ah Rossi hian Azzurri hi World Cup nomawi a chawipui bakah golden ball leh golden boot a dawng a, football chanchinah a sulhnu hian hmun pawimawh tak a chang reng tawh ang.

Italian football hero thih chhan hi tarlan a ni lo a, Italian media ṭhenkhat erawhin hun rei tak aṭang khan tih dam theih loh natna a neih thu an tarlang thung. Rossi hian football khelh a chawlhsan hnuah Sky, Mediaset leh Rai tan pundit (expert) hna thawk a, kum 2004 khan Brazilian legend Pele chuan footballer la dam zinga player ṭha a tih 125 zingah a tel.

Rossi nupui Federica Cappelletti chuan instagram-ah an thlalak dunna a pho chhuak a, 'Per sempre' (chatuan atan) tiin a ziak. Facebook lamah Cappelletti hian, "Nangmah tluk pha reng an awm tawh lo ang. Nang chu i danglam hlak a, i dawta awm tur hi an awm lo," tiin an pa a fak bawk.

September 23, 1956 khan Rossi hi Prato, Italy-ah a piang a, kum ruk a nihin football a khel ṭan. Ṭhian za ho inkawm hlim nan football a khel ṭhin a, a hnu lamah erawh ei zawn nan a hmang.

Rossi hian lehkhazir pahin football a khel a, kum 1972 khan kum 16 mi a nihin hetihlaia Juventus manager Italo Allodi leh head of the youth sector Luciano Moggi ten an hmu fuh. Chieti tournament-a Rossi chevel chuan Juve hotute mit a tlung a, a chhungte erawhin lehkhazir ban sana football khelh an phal lo.

Juve thuneituten a chhungte an hmin a, Rossi hian eizawnna atan football thlang mah se lehkha erawh a zir chhunzawm zel. Italian striker hian infiammite tan entawn tur ṭha tak a hnutchhiah.

Rossi hian theihna sang tak nei mah se football khel turin a taksa a la inphut ṭha tawk lo. Juventus hian chhawr an tum nachungin inhliam avangin season hnihin Serie A a khelh tlai phah.

Inhliam vanga buaina a neih lai pawh hian a beidawng duh lo a, May 1, 1974 khan Coppa Italia-ah Juventus first team tan a inlan. Kum 1976-ah khelhna hmun tam zawk chan beiseiin Serie B club Vicenza a zawm.

Rossi hian Vicenzia tan goal 21 a khung a, top scorer niin Serie A a kaipui. Italy rama inelna sang berah pawh Italian striker hi a che ṭha chhunzawm.

Rossi hian hlawhtling taka Vicenza tana khelh hnuah Perugia-ah a insawn a, 1979–80 season khan Serie A-ah goal 13 khung mah se thamna thubuaiah a inrawlh.

Totonero affair an tih mai dan lo anga pawisa thapna hian Italian football hmai a ti bal hle. AC Milan leh Lazio te chu Serie B-ah tlaktir an ni. 

Mawhphurtu langsar te chu kum 50 chhung football inrawlh an phalsak lo. Rossi pawh hi a tel ve avangin kum thum chhung atan an hrem a, Euro 1980-ah pawh a tel theih loh phah. Italian striker erawhin tihsual a nei lo tihin a pha thung.

Rossi hi a bul ṭanna Juventus-in 1981 khan an la let a, hrem a nih avangin 1980-81 chhung tawp a awl bakah Turin club-ah pawh season khatnaah league match vawi thum chauh a khel.

Italian striker Rossi hian a thiam erawh a theihnghilh lo a, Michel Platini leh Zbigniew Boniek te ho nen inkawpin vanglai hun an hmang. Rossi hian Juve hi Serie A nomawi pahih pahnih bakah European Cup, Coppa Italia, Cup Winners Cup leh Super Cup ah vawi khat ṭheuh a champion pui.

Rossi han Juve tan season li a khelh hnuah Milan leh Hellas Verona tan a khel leh a, a hun tawna ropui ber erawh Turin club tana a khelh laiin a hmang.

Khawvelin Rossi a hriatna erawh FIFA World Cup a ni a, Argentina-a World Cup an nghah ṭum kum 1978 khan Italy chu palina nihpuiin Silver Ball a dawng.

Totonero affair avangin Rossi hi Euro 1980-ah a tel lo. Amaherawhchu a thiam em avangin kum thum chhung hremna chu titawiin kum hnihah a ti tlem a, World Cup 1982-ah a tel.

Espana 1982-ah hian champion lai Argentina-in Diego Maradona an kawl tawh a, Brazil-in  Socrates, Zico leh Falcao te an neih avangin champion tura rinkai an ni. 

Amaherawhchu Italy-in Paulo Rossi an kawl a, Azzurri hian group stage-ah hneh nei lo mah se chak loh an neih chuang loh avangin point thum hmuin second round an lut.

Second round-ah Argentina leh Brazil te nen an awm kawp a, pakhat chiahin semifinal an lut dawn. Italy-in Brazil an hneh ṭumin Rossi hian hattrick a siam a, 3-2 in hnehna an chang.

Italian striker chak, rang leh fing Rossi hian semifinal-a Poland 2-0 a an hneh ṭumin goal hnih a khung a, final-a West Germany 3-1 a an hneh ṭumin goal hmahruai khungin an hneh ṭumin goal a khung ve ve.

Rossi hian goal ruk khungin top scorer a ni a, golden ball a dawng tel. Brazil star Garrincha (1962) leh Argentina striker Mario Kempes (1978) te nen World Cup vawi khata chawimawina pathum dawng thei an ni.

Kum 1982 khan Rossi hian Ballon D'Or, Onze d'Or (European Footballer of the Year) leh L'Equipe Champion of Champions a dawng a, mi bik a ni tih chu a chawimawina dawn hian a nemnghet.