Klopp ropuina dal theitu Ten Hag

Erik Ten Hag-a'n Manchester United a zawm tirha a sawi hmasak chu Premier League-a Pep Guardiola leh Jurgen Klopp te hun a titawp theih thu a ni. Tun season tawpah Klopp-a hun chu a tawp dawn ta a, Dutch manager Ten Hag-a tihtawp chu a ni hauh lo a, mahse Ten Hag-a hian Klopp-a ropuina hi a tidal thei thung.

Man United-in FA Cup aṭangin Klopp-a hote an pet chhuak tawh a; April 7, Pathianni zan dar 8:00 hian Old Trafford-ah club inhal pahnih an inhmachhawn leh dawn. Ten Hag-a hoten hnehna an chang a nih chuan FA Cup-a an pet chhuah bakah Premier League champion beiseina an titawp thei a, hei hi Man United ṭantute chauh ni loin Arsenal leh Manchester City fan-te lawmna tur a ni ang.

Nikum kum tawp khan Anfield-ah Liverpool leh Man United te hi Anfield-ah goal awm loin an inhnehtawk a, FA Cup-ah Man United 4-3 in an chak. Tun season bikah chuan Ten Hag-a'n record a nei ṭha zawk.

Season liam taah erawh Anfield-ah Liverpool hian 7-0 ngawtin Man United hi an sawp a, chutihrualin Old Trafford-ah erawh Man United 2-1 in an chak. Point ang zawnga thlir chuan point thum ve ve an hmu a, Ten Hag leh Klopp an intluk tawk.

Tun ṭum hi Ten Hag leh Klopp te Man United leh Liverpool manager nichunga an inhmachhawn hnuhnung ber tur a ni a, April thla a nih tawh avangin inkhel a pawimawh takzet. Klopp-a'n Premier League nomawi a beisei avangin chak ngei a ṭul a, Ten Hag-a'n season thara UCL an khelh theih nan leh a hna a chhunzawm theih nan chak a ngai thung. Old Trafford-ah inkhel hmuhnawm bik chhawp chhuah a ni dawn.